Aqmolalyq áıel áleýmettik tólemge kómektesemin dep aldap, túrmege tústi

ASTANA. KAZINFORM — Aqmola oblysynda zeınetkerlerdiń atyna zańsyz nesıe rásimdegen áıel qylmystyq jaýaptylyqqa tartyldy. Bul týraly Aqmola oblysynyń prokýratýrasy habarlady.

Sandyqtaý aýdandyq soty aýyl turǵynyna qatysty qylmystyq isti qarady. Tergeý barysynda sottalýshynyń kórshileri men jergilikti zeınetkerlerdiń senimine kirip, olardy aldaý arqyly jalpy somasy 7 mıllıon teńgeden asatyn bank nesıelerin rásimdegeni anyqtaldy.

— Áıel ózin áleýmettik tólemder men túrli qyzmetterdi alýǵa kómektesemin dep tanystyryp, zeınetkerlerdiń qujattaryna, jeke derekterine jáne uıaly telefondaryna qol jetkizgen. Osy málimetterdi paıdalana otyryp, jábirlenýshilerge bildirmeı bank nesıesin rásimdep, túsken qarajatty jeke maqsattaryna jumsaǵan. Sot sheshimimen ol Qylmystyq kodekstiń «Alaıaqtyq» baby boıynsha kináli dep tanylyp, 2 jyl 4 aıǵa bas bostandyǵynan aıyryldy, — delingen vedomstvo taratqan aqparatta.

Prokýratýra mundaı quqyq buzýshylyqtardyń aldyn alý maqsatynda halyqpen kezdesýler ótkizý jáne memlekettik organdarmen birlesken profılaktıkalyq jumystardy kúsheıtip jatqanyn atap ótti.

Aıta keteıik, bıyl Qazaqstan aýqymdy qarjylaı qylmystardyń dúmpýine tap boldy. Zeınetaqy jınaqtary arqyly jasalǵan alaıaqtyqtardan bastap, blogerlik shemalar men bankterge qatysty uıymdasqan qylmystyq toptarǵa deıingi ister qoǵamdy dúr silkindirip, el arasynda qyzý talqylandy. Zardap shekkenderge keltirilgen jalpy shyǵyn ondaǵan mıllıard teńgeden asqan. Myńdaǵan azamatty tuzaqqa túsirgen ondaǵan adam jaýapqa tartyldy. Tolyǵyraq Kazinform tilshisiniń materıalynan oqı alasyz.