Aqmolalyq áıel AITV dıagnozyna qaramastan deni saý besinshi balasyn dúnıege ákeldi
KÓKShETAÝ. KAZINFORM – Dárigerler men mamandardyń qoldaýy, sondaı-aq ýaqytyly em qabyldaý AITV dıagnozy bar adamdarǵa tolyqqandy otbasy quryp, deni saý bala súıýge múmkindik beredi. Mundaı oqıǵanyń mysalyn Aqmola oblystyq AITV ınfektsııasynyń aldyn alý ortalyǵynyń baspasóz hatshysy Nurlybek Qonysbaev aıtyp berdi.
Onyń aıtýynsha, búginde Aqmola oblysynda 1 117 adam dınamıkalyq baqylaýda tur. 2025 jyldyń segiz aıynda 83 jańa jaǵdaı anyqtalǵan. Kórsetkish byltyrǵy deńgeıde saqtalyp otyr. Infektsııanyń negizgi juǵý joly áli de jynystyq qatynas bolyp qala berýde.
— AITV -ǵa qatysty eń keń taraǵan qate túsinik – otbasyn qurý nemese deni saý bala týý múmkin emes degen senim. Alaıda dárigerler AITV -ny qazirgi tańda emdelip, baqylanatyn sozylmaly aýrýlar qataryna jatqyzady. Al deni saý bala týý – shynaıy múmkindik. Bul úshin barlyq jaǵdaı jasalǵan: bilikti mamandar jumys isteıdi, antıretrovırýstyq terapııa tegin beriledi. Ár aýdanda AITV máselelerimen aınalysatyn jaýapty dáriger bar, al medıtsına qyzmetkerleri kómek sapasyn arttyrýǵa jáne stıgmany azaıtýǵa arnalǵan semınarlardan ótedi, – dedi Nurlybek Qonysbaev.
Aıryqsha mysal retinde AITV -statýsy bar aqmolalyq áıeldiń oqıǵasy keltirildi. Ol jaqynda besinshi deni saý nárestesin ómirge ákeldi.
— Patsıentke dıagnoz 15 jyldan astam ýaqyt buryn, alǵashqy júktilik kezinde qoıylǵan. Sodan keıin oǵan antıretrovırýstyq terapııa taǵaıyndalyp, bul óziniń ári bolashaq balasynyń densaýlyǵyna qaýiptiń aldyn aldy, – dedi Qonysbaev.
Áıeldiń ózi alǵash dıagnozdy estigende qatty kúızeliske túskenin jasyrmady.
— Ádettegi qıyndyqtar túkke turǵysyz kórindi. «Nege men? Nege dál men?» degen oı mazalady. Biraq júktilikten bas tartqym kelmedi, birden em qabyldaýǵa kiristim. Ýaqyt óte kele ózimdi qabyldap, ómirmen úılesim taptym. Qazir jubaıymmen birge bes deni saý balany tárbıelep otyrmyz. Maǵan ana atanýǵa kómektesken dárigerlerge alǵysym sheksiz, – dedi ol.
Aqmola oblystyq AITV ınfektsııasynyń aldyn alý ortalyǵynyń psıhology Margarıta Rybınanyń aıtýynsha, AITV -men ómir súretin adamdardyń kóbi vırýstyń ózinen emes, qoǵam tarapynan bolatyn teris pikirden qorqady. Buǵan aqparattyń azdyǵy men stereotıpterdiń áseri bar.
— Patsıentimizdiń tarıhy kórsetkendeı, ýaqytyly em jáne mamandardyń qoldaýy AITV -men ómir súretin adamdarǵa otbasy quryp, deni saý balalardy dúnıege ákelip, tolyqqandy ómir súrýge múmkindik beredi, – dedi ol.
Eske sala keteıik, buǵan deıin AJasóspirimder arasynda AITV juqtyrý 2 ese kóbeıgenin jazǵanbyz