Aqmoladaǵy rýhanı ózgeristerdiń bastaýynda turǵan qazaq teatryna jańa ǵımarat salynǵany oryndy -S. Jalmaǵambetova
ASTANA. Qyrkúıektiń 23-i. QazAqparat /Qanat Mámetqazyuly/ - Aqmoladaǵy rýhanı, mádenı ózgeristerdiń bastaýynda turǵan qazaq mýzykalyq drama teatryna jańa ǵımarat salynǵany oryndy. Búgin Parlament Senatynyń jalpy otyrysynda Úkimet basshysynyń atyna saýal joldaǵan depýtat Svetlana Jalmaǵambetova osylaı málim etti.
Sóz basynda depýtat birqatar jyldar boıy Aqmola oblysyndaǵy qyzmette, keıin Parlamentte ónerdiń janashyry, qamqorshysy bolyp júrgendigin aıtyp, kezinde Aqmola oblystyq Qazaq mýzykalyq drama teatrynyń ashylýyna óziniń de tikeleı qatysy bolǵandyǵyn málim etti.
«Osy teatr orystanyp bara jatqan Aqmolaǵa jańa lep, tyń betburys pen ózgeris ákelgen edi. Teatrdyń tóńireginde barlyq namysy bar qazaqtar jınalyp, birigetinbiz. Ondaǵy árbir premerany úlken oqıǵa retinde qabyldap, soǵan qýanyshymyzdy bólisetinbiz. Sonymen qatar, Qazaqstanda alǵash ret dala teatryn qurý da Aqmoladan bastaý alǵan-dy. Qazaqtyń talantty ártisi Jaqyp Omarov Bógenbaı batyrdyń 300 jyldyq toıynda Ereımentaýdyń baýraıynda ashyq dala spektaklin qoıyp, bul keıin basqa oblystarǵa da úlgi boldy. Bir sózben aıtqanda Aqmola jerindegi oń ózgerister sol teatrdyń ashylýynan, qalaǵa túpki ataýyn qaıtarýdan, buryn bolmaǵan meshit salýdan bastalǵan bolatyn»,- dep eske aldy senator.
Sonymen birge, depýtat keıinnen bundaı ózgeristerdiń Aqmolanyń Astana bolǵan tusynda da jalǵasqanyn tilge tıek etti. «Árıne, qazir qalada teatr da óner ujymdary da kóp. Biraq, qazaq mýzykalyq drama teatrynyń osy qalaǵa, jańa astanaǵa táýelsiz Qazaqstanǵa jasaǵan eńbegi erekshe bolatyn. Meniń oıymsha, bul áli laıyqty baǵalanbaı keledi», dedi S. Jalmaǵambetova. Onyń aıtýynsha, Táýelsizdikpen túıdeı qurdas teatr 20 jyldyǵynda eski ǵımaratyn ózgerte almaı, baıaǵy kóne qalpynda áli kúnge deıin tur. Bul jyldary elordada kóptegen mádenıet oshaqtarynyń salynǵanyn aıtqan senator, qazaq teatryna kezek jetpeı keletinine qynjylys bildirdi.
