Aqmoladaǵy «Nomads Camp» kıiz úı lagerinde mektep oqýshylary demalýda
KÓKShETAÝ. QazAqparat -Aqmola oblysynyń Aqkóldegi «Nomads Camp» halyqaralyq kıiz úı lagerinde Astana qalasy men Qyzylorda oblysynan kelgen 50-ge jýyq bala demalýda, dep habarlaıdy QazAqparat tilshisi.
Bul joly demalyp jatqan balalardyń deni sabaq úlgerimderi jaqsy mektep oqýshylary men áleýmettik jaǵynnan az qamtylǵan otbasylardaǵy balalar. Olar «Nomads Camp» halyqaralyq kıiz úı lagerinde qazaq halqynyń salt-dástúri, ádep-ǵurpy, ulttyq taǵamdary, áskerı óner jáne qolóner sheberleriniń týyndylarymen tanysýda.
«Kıiz úı lageri orta ǵasyrlardaǵy qazaq halqynyń turmysyna uqsas etip jasalǵan. Lagerge demalýǵa kelgen balalar erte kezdegi kóshpeli halyqtyń ómiri men salt-dástúrin kózben kórip, is júzinde sezine alady», - deıdi jobanyń avtory, Qazaqstandaǵy skaýt qozǵalysynyń jetekshisi Ildar Katenov.
Aıta ketý kerek, joba Aqmola oblysy ákimdiginiń qoldaýymen júzege asyrylyp otyr. Ótken jyldyń sońynda Aqkól aýdanynyń Ernazar aýylynda skaýt lageri úshin jer telimi bólinip, oǵan «Nomads Camp» halyqaralyq kıiz úı lageri ashyldy. Onda ár 6 kún saıyn birneshe maýsym ótkizýdi josparlanyp otyr.
Bir maýsymda 8-17 jas aralyǵyndaǵy 100-150 balanyń kıiz úı lagerinde demalýyna múmkindigi bar. Qazaqstandaǵy skaýt qozǵalysynyń bastamasymen sońǵy 25 jylda 10 myń balanyń qatysýymen 100-den astam dala lagerleri men sletter uıymdastyrylǵan.
