Aqmoladaǵy kásiporyn elimizdegi qus etine suranystyń 15 paıyzyn jaba alady
NUR-SULTAN. QazAqparat – Makınsk qus fabrıkasy Qazaqstannyń qus eti boıynsha ımportynyń úshten bir bóligin japqaly otyr, dep habarlaıdy QazAqparat tilshisi.
«Qus sharýashylyǵy salasynda bizde zor áleýet bar. Makınsk qus fabrıkasynyń birinshi kezeńiniń iske qosylýymen (25 myń tonna, «Kýs Vkýs») qus etiniń óndirisi 3 esege ósti. Osylaısha, kásiporynnyń respýblıkalyq kólemdegi úlesi de artqanyn aıta ketý kerek. 2020 jyly ekinshi kezeń (50 myń tonnaǵa deıin) iske qosylǵannan keıin Makınsk kásiporny Qazaqstannyń ishki naryǵynyń qus etine suranysynyń 15 paıyzyn qamtamasyz ete alady. Sondaı-aq, ol kásiporyn eldiń osy ónim ımportynyń 1/3 bóligin jabady (jyldyq ımport 170 myń tonnaǵa deıin)», - dedi OKQ-da ótken baspasóz máslıhatynda Aqmola oblysynyń ákimi Ermek Marjyqbaev.
Aımaq basshysy sondaı-aq, mal sharýashylyǵyndaǵy etti jáne sútti baǵytta jumystyń qarqyndy júrgizilip jatqanyn aıtyp berdi.
«Búgingi tańda bizdiń oblysymyz respýblıka boıynsha mal bordaqylaýdyń eń úlken áleýetine ıe. Bir ýaqytta 32 myńǵa deıin iri qara maldy soıýǵa múmkindik bar. Buǵan qoljetimdi bordaqylaý alańdaryn taǵy 10 myń basqa ulǵaıtý arqyly qol jetkizildi. Sonymen qatar asyl tuqymdy mal satyp alý boıynsha jumystar júrgizilýde. Osy jyly aımaqqa Chehııa, Slovakııa jáne Reseıden 6 myńnan astam iri qara mal ákelindi», - dedi ol.
