Aqmoladaǵy jol apatynan keıin polıtseıler myńǵa jýyq kólikti baqylaýǵa aldy

ASTANA. KAZINFORM — Aqmola oblysynyń barlyq baǵyty boıynsha joldarda avtokólikterdi  súıemeldep aparý sharasy uıymdastyryldy. 

— Aýa raıy men jappaı jol-kólik oqıǵasyna baılanysty Aqmola oblysynyń patrýldik polıtsııasy respýblıkalyq mańyzy bar joldarda birneshe avtokolonnany súıemeldedi. Qazirgi ýaqytta polıtsııanyń baqylaýynda shamamen myń avtokólik bar, - dep habarlady Aqmola oblystyq polıtsııa departamentiniń baspasóz qyzmeti.  

Osylaısha, jol apaty bolǵan jerden Krasnyı gornıak aýylyna deıin polıtsııa qyzmetkerleri qarama-qarsy jolaqpen 400-den astam kólikti súıemeldep jetkizdi. Bul kolonna Astana qalasyna qaraı bara jatyr. Taǵy bir kolonna Astanadan Ereımentaý baǵytyna qaraı júrýde. Úshinshi kolonna shamamen 350 kólikten quralǵan jáne Astanadan Qaraǵandyǵa qaraı baǵyt aldy. Bul kólikterdiń ishinde 50 júk kóligi bar.

— Jol apatynyń aldyn alý maqsatynda polıtseıler júrgizýshilermen kolonnada júrý erejeleri, araqashyqtyqty saqtaý jáne belgilengen jyldamdyqty ustaný qajettiligi týraly túsindirý jumystaryn júrgizip jatyr, - dep tolyqtyrdy vedomstvo. 

Buǵan deıin «Astana-Şýche» tas jolynda jappaı kólik apaty bolǵany habarlanǵan edi. Qutqarýshylar 63 eresekti jáne 8 balany evakýatsııalady.