Aqmoladaǵy Shaiqas-2026 fınalynda kýrsanttar dron men robotty synaıdy
ASTANA. KAZINFORM – 14-15 tamyz kúnderi Aqmola oblysyndaǵy «Amandyq» polıgonynda alǵashqy ulttyq ınjenerlik chempıonat — Shaiqas-2026 baıqaýynyń fınaly ótedi.
Qarýly kúshter atynan chempıonatqa qatysatyn komandalardyń biri — Radıoelektronıka jáne baılanys áskerı-ınjenerlik ınstıtýtynyń kýrsanttary. Bolashaq ofıtserler «Áýe» jáne «Jer» baǵyttary boıynsha baq synaıdy.
Baıqaý tapsyrmalaryn oryndaý barysynda kýrsanttar ózderi ázirlegen tehnıkalyq qurylǵylardy — ushqyshsyz avıatsııalyq júıe men jerústi robottandyrylǵan platformasyn qoldanady.
«Áýe» baǵyty boıynsha komanda áýeden barlaý júrgizip, FPV Battle saıysyna qatysyp, ushqyshsyz júıeni jedel qurastyrý daǵdylaryn kórsetedi.
Al «Jer» kezeńinde kýrsanttar jerústi robottandyrylǵan platformasymen jumys isteıdi. Robottandyrylǵan tehnıkanyń kómegimen olar manekenderdi evakýatsııalap, mınalardyń maketterin ornatý tapsyrmalaryn jasaıdy.
Komandanyń daıyndyǵyna Radıoelektronıka jáne baılanys áskerı-ınjenerlik ınstıtýty arnaıy pánder kafedrasynyń aǵa oqytýshysy, podpolkovnık Asqar Aıshev jetekshilik etedi.
— Biz úshin Shaiqas chempıonatyna qatysý — eń aldymen kýrsanttardyń bilimderi men daǵdylaryn tájirıbe júzinde synaý múmkindigi. Sonymen qatar olardyń chempıonatta qoldanylatyn tehnıkany ázirleýge ózderi qatysqany mańyzdy. Olar tehnıkanyń qurylymy men múmkindikterin jaqsy biledi. Qazir basty mindet — komandanyń úılesimdi jumysyn kórsetip, chempıonatta laıyqty nátıjege ıe bolý, — dedi podpolkovnık Asqar Aıshev.
Qazirgi ýaqytta komanda daıyndyqtyń qorytyndy kezeńinde. Kýrsanttar tehnıkalyq synaqtar men jattyǵýlardan ótip, baıqaý tapsyrmalaryn pysyqtap, ózderi ázirlegen júıelerdiń múmkindikterin tekserdi.
Alda — fınaldyq synaqtar. Onda kýrsanttar ınjenerlik bilimderi men tehnıkalyq daǵdylaryn is júzinde qoldanyp, komandalyq jumysyn kórsetetin bolady.
Aıta ketelik Qarýly kúshterde drondarǵa qarsy qorǵanys tásilderi jetildirip jatyr.
