Aqmoladaǵy respýblıkalyq ındýstrııalyq aımaǵyna 1,1 trln teńge ınvestıtsııa tartyldy
KÓKShETAÝ. KAZINFORM — Aqmola oblysynda respýblıkalyq mańyzy bar «AQMOLA» ındýstrııalyq aımaǵynyń irgetasyna kapsýla salý rásimi ótti, dep habarlaıdy oblys ákimdiginiń baspasóz qyzmeti.
Aýdany 1 myń gektarǵa jýyq ındýstrııalyq aımaq elordaǵa jaqyn ornalasqan. Bul — jańa zaýyttar men óndiris oshaqtaryn ashýǵa qolaıly barlyq ınfraqurylymmen qamtamasyz etilgen aýmaq. Qazirgi tańda munda jalpy kólemi 1,1 trln teńgeden asatyn ınvestıtsııaǵa ıe jeti joba júzege asyryla bastady. Investorlar geografııasy Qytaı, Túrkııa, Sıngapýr jáne Qazaqstan elderin qamtıdy. Jobalar aıasynda 4,5 myńnan astam jumys orny ashylady dep josparlanyp otyr.
Saltanatty sharaǵa Aqmola oblysynyń ákimi Marat Ahmetjanov pen QR aýyl sharýashylyǵy mınıstri Aıdarbek Saparov qatysty.
Oblys ákimi óz sózinde jańa ındýstrııalyq aımaq óńir ekonomıkasynyń damýyna serpin berip qana qoımaı, eldiń ındýstrııalandyrý men ınvestıtsııa tartý jónindegi ulttyq strategııasynda mańyzdy ról atqaratynyn atap ótti.
— Memleket basshysynyń tapsyrmasymen qurylǵan bul respýblıkalyq ındýstrııalyq aımaqta otandyq jáne sheteldik jetekshi kompanııalardyń óndiristeri ornalasady. Óndiristik qýattardyń shoǵyrlanýy aýyl sharýashylyǵy, qaıta óńdeý, logıstıka jáne basqa da salalarǵa mýltıplıkatıvti áser etip, óńirdiń damýyna tyń serpin beredi, — dep atap ótti Marat Ahmetjanov.
Óz kezeginde aýyl sharýashylyǵy mınıstri Aıdarbek Saparov bul jobanyń elimiz úshin erekshe mańyzǵa ıe ekenin aıtty.
— Bul — elimiz úshin asa mańyzdy joba. Onyń aıasynda jańa óndiris oshaqtary iske qosylyp, halyqty jumyspen qamtý múmkindikteri keńeıedi. Memleket basshysy agroónerkásip keshenin damytýǵa, ónerkásipti órkendetýge aıryqsha nazar aýdaryp otyr. Osy baǵytta jer telimderimen qamtamasyz etý, ınjenerlik ınfraqurylym tartý sekildi qoldaý sharalary júıeli túrde iske asyrylyp jatyr. Tek bıyldyń ózinde respýblıka boıynsha 180-ge jýyq ındýstrııalyq joba júzege asyrylýda. Sonyń biri — búgin irgetasyna kapsýla salynǵan «AQMOLA» ındýstrııalyq aımaǵy. Onyń elordaǵa jaqyn ornalasýy — aıqyn artyqshylyq. Bul joba elorda men elimizdiń damýyna eleýli úles qosady dep senemin, — dedi mınıstr.
Aıta ketý kerek, iske asyryla bastaǵan jobalardyń biri — bıdaıdy tereń óńdeıtin óndiristik keshen. Jobany júzege asyrýshy — qytaılyq Dalian Hesheng Holdings kompanııasy. Joba úsh kezeńmen 2025-2028 jyldar aralyǵynda júzege asyrylady. Alǵashqy kezeńde natrıı glýtamaty, glıýten untaǵy jáne qosalqy ónimder óndirisi iske qosylady. Qazirgi tańda ınvestor bıznes-jospar ázirlep, qajetti qujattardy daıyndaý jumystaryn bastady.
— Qazaqstanda óńdeýshi ónerkásiptiń jańa baǵytyn qalyptastyratyn jobany júzege asyrý — bizdiń kompanııa úshin úlken mártebe. Bul — óz salasyndaǵy eń ozyq jobalardyń biri. Biz bul jobaǵa 900 mıllıard teńge ınvestıtsııa quıyp otyrmyz. Jaqyn arada kásiporynda myńnan astam jumys orny ashylady. Ónimniń baǵasy men sapasyn arttyrý úshin biz bıofermentatsııa men bıoınjenerııa salalaryndaǵy sońǵy tehnologııalardy qoldanamyz. Ónim Qytaı, Taıaý Shyǵys, Ońtústik-Shyǵys Azııa jáne Eýropa naryqtarynda úlken suranysqa ıe bolady, — dedi Dalian Hesheng Holdings kompanııasy fılıalynyń dırektory ıAo Sýn.
Josparlanǵan jobalar qatarynda — klınker ónimin shyǵaratyn zaýyttyń qurylysy da bar. Bul jobany otandyq ınvestor — «Terracottas» Astana Ceramic JShS 2027 jyldyń sońyna deıin júzege asyrady. Al agrohımııalyq tyńaıtqyshtar men pestıtsıdter shyǵaratyn agrohımııalyq keshen salýdy túrkııalyq «YDA Group» kompanııasy josparlap otyr. Suıytylǵan tabıǵı gaz óndiretin zaýytty «Qazaq munaı jáne gaz ınstıtýty» AQ salatyn bolady. Jańa tehnologııa gazdy 600 esege deıin syǵýǵa múmkindik beredi.
Sonymen qatar Atasu Group kompanııasynyń kólik-logıstıkalyq ortalyǵy, «Remsintez RK» JShS-niń aýyl sharýashylyǵy tehnıkalaryn shyǵaratyn zaýyty da boı kóteredi.
Qytaılyq Eagle Architecture Technology Co., Ltd. kompanııasy bıtýmdyq shatyr gıdrooqshaýlaǵysh materıaldary, avtoklavty gazobeton bloktary, polıvınılhlorıd, alıýmınıı fasadtary, vıtrajdar, tereze jáne esik qurylǵylaryn shyǵaratyn zaýyt salýdy josparlap otyr.
Aıta keteıik, Aqmola oblysynda Kókshetaý qalasy men Tselınograd aýdanynda da óńirlik ındýstrııalyq aımaqtar qurylǵan.
Budan buryn Aqmola oblysynda qaıtarylǵan aktıvter esebinen salynǵan mekemeler paıdalanýǵa berilgenin jazǵanbyz.