Aqmoladaǵy dúleı jel ǵımarattardyń shatyryn ushyryp, eldimekenderdi jaryqsyz qaldyrdy
Aqmola oblysynda senbi kúni bolǵan dúleı jeldiń saldarynan birqatar aýdandaǵy eldi mekender jaryqsyz qalyp, kóptegen ǵımarattyń shatyry ushyp ketti, dep habarlaıdy Kazinform.
18 qarashada Aqmola oblysy aýmaǵynda aýa raıynyń nasharlaýyna baılanysty avtokólik joldarynda kólik qozǵalysyna shekteý qoıyldy. TJD jáne PD qyzmetkerleri oblys turǵyndary men qonaqtaryna jolǵa shyqpaý jóninde BAQ jáne áleýmettik jeliler arqyly beınejazba joldady. Patrýldik narıadtar kúsheıtilgen rejımge kóshti.
Degenmen, tabıǵattyń tosyn minezi-jyldamdyǵy 20 m/s jeldiń saldarynan birqatar aýdandaǵy eldimekenderde elektr berý jelileri zaqymdanyp, ǵımarattardyń shatyry búlindi.
Atap aıtqanda, Kókshetaý qalasynda 47 kóppáterli turǵyn úı, Krasnoıar kentinde 115 abonent, Qosshy qalasynda 1 230 abonent, Tselınograd aýdanynyń Taıtóbe aýylynda 270 úı, sondaı-aq ózge de aýdandardaǵy turǵyn úıler jaryqsyz qaldy.
Aqmola oblysy TJD baspasóz qyzmetiniń málimetinshe, Kókshetaýdaǵy ortalyq ámbebep dúkeni ǵımaraty shatyrynyń jartysyn (170 sharshy metr aýmaǵy), «Saryarqa» shaǵynaýdanyndaǵy kópqabatty jańa turǵyn úıdiń shatyryn, úsh avtobýs aıaldamasyn, Qosshy qalasyndaǵy №10 úıdiń shatyryn jel ushyrdy.
Osyǵan baılanysty oblys ákimdigi janynan jedel shtab qurylyp, jaǵdaı óńir basshylyǵynyń jiti baqylaýyna alyndy. Ákimdiktiń málimetinshe, qazirgi kezde qalpyna keltirý jumystary barlyq ýchaskede júrgizilýde.
Sonymen birge TJD baspasóz qyzmetinen túsindirgendeı, qazirgi ýaqytta daýyldyń saldaryn esepteý jáne taldaý júrgizilýde. Tolyq aqparat keıin joldanady. Búgin tańǵy saǵat 07:00-den bastap respýblıkalyq mańyzy bar avtomobıl joldarynyń barlyq ýchaskesindegi qozǵalys qaıta jandandy.
Aıta ketsek, budan buryn Qosshy qalasynda kúshti jel saldarynan 1 229 abonent jaryqsyz qalǵanyn jazǵan edik.
