Aqmoladaǵy analar ólimi respýblıkalyq kórsetkishten 7 ese kóp – mınıstr
ASTANA. KAZINFORM – Qazaqstannyń 6 óńirde ana ólimi, 5 óńirinde náreste ólimi joǵary bolyp otyr. Bul týraly Densaýlyq saqtaý mınıstri Aqmaral Álnazarova búgingi Úkimet otyrysynda aıtyp berdi.
– Júıeli qabyldanyp jatqan sharalarǵa qaramastan, 6 óńirde (Aqmola, Jetisý, Jambyl, Abaı, Aqtóbe,Qostanaı) ana óliminiń ósýi baıqalady. Ásirese Aqmola oblysynda eń joǵary kórsetkish respýblıkalyq kórsetkishten 7 ese joǵary. Qurylymy boıynsha ana óliminiń basym sebepteri: aýyr ekstragenıtaldy aýrýlar – 55% jáne akýsherlik jaǵdaılar – 45 % bolyp otyr, – dedi Aqmaral Álnazarova.
Sonymen birge, ana óliminiń árbir jaǵdaıyna ǵylymı ortalyqtar men joǵary oqý oryndarynyń barlyq beıindegi mamandary jan-jaqty saraptama júrgizedi.
Qyzylorda, Qostanaı, Batys Qazaqstan, Jambyl jáne Abaı oblystarynda náreste ólimi kórsetkishi joǵary. Náreste ólimi sebepteri boıynsha birinshi orynda perınataldyq kezeńdegi jaǵdaı (47,7%), odan keıin týa bitken aqaýlar (19,6%) jáne tynys alý aǵzalarynyń aýrýlary (7,6%) tur.
– Pavlodar, Soltústik Qazaqstan, Qostanaı jáne Ulytaý oblystarynda úı jaǵdaıynda tirkelgen ólim-jitim kórsetkishi respýblıkalyq kórsetkishten 2 ese joǵary. Osyǵan oraı, medıtsınalyq uıymdardy beıindi mamandarmen jasaqtaýǵa, biliktiligin arttyrýǵa, materıaldyq-tehnıkalyq bazasyn nyǵaıtýǵa, júktiler men balalardy oblys ortalyǵyna jetkizetin kólik bólýge jáne osal toptaǵy fertıldik jastaǵy áıelderdi kontratseptıvtik zattarmen qamtamasyz etýge ákimderden jergilikti bıýdjetten qarajat qarastyrýdy suraımyz, – dedi Desnaýlyq saqtaý mınıstri.
Ana men bala óliminiń faktileri boıynsha 44 medıtsınalyq uıymda jospardan tys tekserý júrgizilgen. Jambyl jáne Aqmola oblystaryndaǵy bosandyrý uıymdarynda aýqymdy tekserý jumysy uıymdastyryldy. Tekserý qorytyndysy boıynsha óńirlerde tirkelgen kemshilikterdi joıý boıynsha jedel is-sharalar bekitilgen.
– Bıylǵy qyrkúıek aıynan bastap qadaǵalaý fýnktsııasy Medıtsınalyq jáne farmatsevtıkalyq baqylaý komıtetine beriledi (lıtsenzııany toqtata turý jáne sertıfıkat joq mamandy jumystan shettetý). Sondaı-aq patsıentterdi qoldaý qyzmetteri men biliktilik talaptary kúsheıtiledi. Óńirlerde medıtsınalyq kómektiń sapasyn basqarý tıimdiligin arttyrý úshin KPI-ǵa sapa ındıkatorlary engizildi, – dep túsindirdi vedomstvo basshysy.
Aıta keteıik, jyl basynan beri elimizde ana óliminiń kórsetkishi 10%-ǵa, náreste ólimi kórsetkishi 26%-ǵa tómendedi.
Aýyldyq jerlerde joǵary syn-qater tobyndaǵy júkti áıelderdi emdeýge jatqyzýǵa, asqynǵan bosanýdan keıingi kezeńde áıelderdi ońaltýǵa arnalǵan «Salaýatty ana» pansıonattary ashylyp jatyr.
Buǵan deıin Aqmaral Álnazarova aýyldyq jerlerdegi medıtsınalyq kadr tapshylyǵy máselesi qalaı sheshiletinin aıtyp bergen edi.
Sondaı-aq elimizdiń 18 oblysynda perzenthanalar jańǵyrtylyp, 12 qalada zamanaýı perzenthanalar salynatyn boldy.