Aqmolada jylý men jaryq baǵasy kóterilmeıdi
KÓKShETAÝ. QazAqparat - Aqmola oblysynda monopolıst kompanııalarǵa tarıfti kóterýge ruqsat etilmedi. Bul týraly Aqmola oblysy boıynsha tabıǵı monopolııalardy retteý jáne básekelestikti qorǵaý departamenti basshysynyń orynbasary Áset Qurashev aıtty, dep habarlaıdy QazAqparat tilshisi.
«Monopolııaǵa qarsy organ retinde básekelestikti qorǵaý, tarıftik júıelendirýshi retinde tabıǵı monopolııalardy retteý» taqyrybynda ótken brıfıngte departament basshysynyń orynbasary «Kókshetaý jylý» kommýnaldyq kásiporny men «Kókshetaý energo ortalyǵy» JShS 2016-2017 jyldar aralyǵynda jylý men elektr energııasyna tarıfti kóterý jóninde birneshe ret ótinishpen júgingendigin aıtty. Alaıda, tabıǵı monopolııalardy retteý jáne básekelestikti qorǵaý departamenti tarapynan tarıfti kóterýge ruqsat berilmegen.
«Aǵymdaǵy jyldyń qyrkúıek aıynda «Kókshetaý jylý» kommýnaldyq kásiporyny jylýmen qamtamasyz etý boıynsha saralanǵan tarıfti ózgertý týraly usynys jasady. Oǵan esepteý aspaptaryn qoldanatyn abonnetterdiń azaıýy saldarynan qyzmet kórsetý kóleminiń ózgerýi sebep bolǵan. Alaıda, naqty negiz bolmaǵan soń qoldanystaǵy zańnama talaptaryna saı kásiporynǵa tarıf kóterýge ruqsat etilmedi»,- dedi Áset Qurashev óńirlik kommýnıkatsııalar qyzmetinde.
«Kókshetaý jylý» kommýnaldyq kásiporyny uzaq merzimdik tarıf boıynsha Kókshetaý qalasyn jylýmen qamtamasyz etip keledi. Osyǵan sáıkes, jylýǵa saralanǵan tarıf deńgeıi tutynýshylar úshin 2015 jyldyń 1 jeltoqsanynan 2020 jyldyń 31 jeltoqsany aralyǵyndaǵy uzaq merzimge bekitilgen.
Eske sala keteıik, bul «Kókshetaý jylý» kommýnaldyq kásipornynyń bıylǵy jylǵa ekinshi ret jylý tarıfin kóterýge usynysy. Ekeýinde de Aqmola oblysy boıynsha tabıǵı monopolııalardy retteý jáne básekelestikti qorǵaý departamenti tarapynan ruqsat etilmedi.
Al, elektr energııasynyń qunyna keletin bolsaq, qazirgi kezdegi tarıf «Kókshetaý energııa ortalyǵy» JShS-niń Aqmola oblysy boıynsha tabıǵı monopolııalardy retteý jáne básekelestikti qorǵaý departamentimen 2016 jyldyń 1 qańtaryndaǵy kelisimge sáıkes júzege asyrylýda. Degenmen, «KEGOS» AQ 2017 jyldyń 1 qańtarynan bastap, tarıfti kóterýine baılanysty «Kókshetaý energııa ortalyǵy» JShS tarapynan elektr energııasynyń qunyn kóterý týraly úsh ret ótinish túsken. Biraq tarıfti kóterý týraly sheshim shyǵarylmady.
Áset Qurashevtyń aıtýynsha, departamentke aǵymdaǵy jyly tarıfti ózgertý jáne bekitý týraly 65 ótinish túsken. Onyń ishinde segizin ótinishi berýshiler ózderi keıin qaıtaryp alsa, 22-i materıaldardy usyný tártibiniń buzylǵany úshin ótinish qaralmady. Degenmen, osyǵan qaramastan 34 tarıf bektildi. Onyń ishinde 22 tarıf jańadan qurylǵan sýbektiler nemese jańa qyzmet túrleri, nysandar boıynsha bekitilip otyr.
