Aqmolada jylý beretin mekemeniń qyzmetkerlerine sot úkimi shyqty

KÓKShETAÝ. QazAqparat – Kókshetaýda «Kókshetaý jylý» kommýnaldyq kásiporyny men Aqmola oblysy boıynsha tabıǵı monopolııalardy retteý, básekelestikti jáne tutynýshylardyń quqyqtaryn qorǵaý departamentiniń burynǵy basshylaryna qatysty sot úkimi shyqty. Eks-sheneýnikterge aıyppul jáne bas bostandyǵynan aıyrý jazasy taǵaıyndaldy, dep habarlaıdy QazAqparat tilshisi.

Kókshetaý qalalyq sotynyń úkimimen «Kókshetaý jylý» kommýnaldyq kásiporynynyń burynǵy bas dırektory QR QK 361 babynyń 1 bóligi boıynsha (qyzmettik quzyretin teris paıdalaný) qylmys jasaǵany úshin kánili dep tanylyp, 500 aılyq eseptik kórsetkish (1 202 500 teńge) mólsherinde aıyppul salyndy. Al, onyń ekonomıka jáne qarjy jónindegi burynǵy orynbasary sybaılastyq jáne qyzmettik quzyretin teris paıdalanǵany úshin 200 aılyq eseptik kórsetkish, ıaǵnı, 481 000 teńge aıyppul tóleıtin bolady. Ekeýi de memlekettik qyzmette jumys isteý quqyǵynan aıyryldy.

Sonymen qatar, Aqmola oblysy boıynsha tabıǵı monopolııalardy retteý, básekelestikti jáne tutynýshylardyń quqyqtaryn qorǵaý departamentiniń burynǵy basshysy men onyń orynbasary QR QK 371-babynyń 1-bóligi boıynsha (salǵyrttyq) kináli dep tanyldy. Burynǵy basshyǵa 300 aılyq eseptik kórsetkish (680 700 teńge) mólsherinde aıyppul, al, orynbasaryna 6 aı merzimge bas bostandyǵyn shekteý jazasy taǵaıyndaldy.

Bulardyń ekeýi de turaqty mekenjaıyn eskertýsiz aýystyra almaıdy, sondaı-aq, quzyretti memlekettik organnyń ruqsatynsyz ózge jerge bara almaıdy.

Sot úkimi kúshine engen joq.

Eske sala keteıik, osyǵan deıin habarlaǵanymyzdaı, prokýrorlyq tekseris kezinde «Kókshetaý jylý» kommýnaldyq kásipornynyń 2015-2017 jyldary esh negizsiz 1,3 mıllıard teńge kóleminde tabys tapqany anyqtaldy. Óńir prokýratýrasynyń talaby boıynsha jylý aqysyna ýaqytsha ótemaqy tarıfi belgilendi. Nátıjesinde ótken jylǵy jeltoqsannyń 1-nen bastap Kókshetaý turǵyndary 1 sharshy metr úshin 73,4 teńge jylý aqysyn, ıaǵnı, eki ese tómendetilgen baǵamen tóleı bastady.