Aqmolada jyl sońyna deıin 36 memlekettik mekemeniń ataýy ózgeredi

KÓKShETAÝ. QazAqparat – Aqmola oblysynda jyl sońyna deıin 36 memlekettik mekemeniń ataýy ózgertiledi. Bul týraly jýrnalıstermen ótken brıfıngte oblystyq ishki saıasat basqarmasynyń basshysy Altynaı Ámirenova málim etti, dep habarlaıdy QazAqparat tilshisi.

Brıfıngte basqarma basshysy, til saıasatynyń mańyzdy baǵyty - onomastıka máselesine toqtaldy.

«Elimizde Ulttyq sanaq ótkizilýine baılanysty 2020 jyldan bastap eldi mekender men kóshelerdi qaıta ataý jumystary birshama toqtap qaldy. Alaıda, túsindirý jáne zertteý jumystary júrgizilip jatyr. Aqmola oblysy eldi mekenderdiń tarıhı ataýlaryn anyqtaý maqsatynda birneshe jyldan beri QR Ulttyq mýzeıimen birlesip jumys isteýde. Qazirgi ýaqytta oblys aýmaǵyndaǵy 120 eldi mekenniń tarıhı ataýlary tabylyp, BAQ jáne áleýmettik jelilerge jarııalanyp, jergilikti halyqqa túsindirý jumystary júrgizilýde. Bıylǵy jyldyń sońyna deıin 36 memlekettik mekemeniń ataýyn ózgertýdi josparlap otyrmyz. Oblys aýmaǵyndaǵy mektepterge halqymyzdyń maqtan tutar tulǵalarynyń esimi berilmekshi», - dedi Altynaı Ámirenova.

Sonymen birge, basqarma basshysy 2021 jyldyń birinshi jartyjyldyǵynda Aqmola oblysyna qarasty 26 memlekettik mekemege profılaktıkalyq baqylaý jumystary júrgizilgenin atap ótti.

«Profılaktıkalyq baqylaý barysynda «Qazaqstan Respýblıkasyndaǵy til týraly» Qazaqstan Respýblıkasy Zańynyń birneshe baptary buzylǵany anyqtaldy. Qazirgi ýaqytta buzýshylyqtar túzetildi. Taǵy bir aıta ketetin ózekti máseleniń biri - syrtqy kórneki aqparattardyń jáne jarnamalardyń til zańnamalaryna sáıkestigi men saýattylyǵy. Bul másele bizdiń basqarmanyń únemi nazarynda. 2021 jyldyń 1-shi jartyjyldyǵynda zańǵa qaıshy jáne saýatsyz jarnamalardyń aldyn alý maqsatynda oblys aýmaǵynda «Qala kelbeti», «Aýyl kelbeti» atty 102 reıd jumystaryn júrgizildi. Jumys barysynda 1105 saýda jáne qyzmet kórsetý obektisine monıtorıng júrgizilip, zańnama talaptaryn buzǵan 1910 jarnama anyqtaldy. Atalǵan zańbuzýshylyqtardy joıý maqsatynda Til zańnamalaryna túsindirý jumystary júrgizilip, Qazaqstan Respýblıkasyndaǵy jarnamaǵa qoıylatyn jalpy talaptar jazylǵan býkletter taratyldy. Nátıjesinde zań talaptaryn buzǵan 136 jarnamany alyp tastasa, 977-i túzetildi», - dedi Altynaı Ámirenova.

Budan bólek, brıfıngte aıtylǵandaı, kórneki aqparattardyń durys jazylýy boıynsha túsindirý jáne keńes berý jumystaryn uıymdastyrý maqsatynda 34 shara ótkizilipti. Oblys aýmaǵynda «Jedel jeli» telefondaryna jeke kásipkerler tarapynan 411 qońyraý shalynyp, kórneki aqparattar men jarnamalarǵa qatysty suraqtaryna jaýap berildi jáne 442 jarnama eskızine kelisý jumystary júrgizildi. Mundaı sharalar aldaǵy ýaqytta da jalǵasyn tabatyn bolady.

Aslan Ospanov.