Aqmolada jyl basynan beri 55 adam jol apatynan qaza tapqan
KÓKShETAÝ. QazAqparat – Aqmola oblysynda jyl basynan beri 400 jol apaty bolyp, onda 55 adam qaza tapqan, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.
Mundaı qaıǵyly statıstıka aımaqtyń bas polıtseıi, general-maıor Berik Bilálovtiń patrýl polıtseılerimen kezdesýinde aıtyldy.
Berik Bilálov jol-kólik oqıǵalaryn azaıtý – polıtsııanyń aldynda turǵyn negizgi mindet ekenin atap ótti. Degenmen, búgingi tańda óńirde 400 jol apaty bolyp, saldarynan 55 adam kóz jumǵan.
«Jergilikti polıtsııa basqarmasynyń bastyǵy Serik Baımuqanovtyń bergen málimetine sensek, kún saıyn patrýl polıtseıleri qoǵamdyq tártipti saqtaý jáne jol qaýipsizdigin qamtamasyz etý úshin 24 patrýl baǵyty boıynsha eki aýysymdy rejımde jumys isteıdi. Polıtseıler jolda táýligine 24 saǵat qyzmet etedi. Polıtsııa qabyldaǵan sharalar arqasynda 2 myńnan astam zań buzý faktileriniń aldy alyndy. Alkogol ishimdik iship, kólik júrgizgen 68 adam ustaldy. Jyldamdyqty asyrǵan 162 júrgizýshi men joldy tyıym salynǵan jerde kesip ótken 400 jaıaý júrginshi jaýapqa tartyldy», - dep málim etti vedomstvodan.
Berik Bilálov patrýl polıtsııasy komandırlerine dástúrli statıstıkadan bas tartyp, óz jumysyn jol-kólik oqıǵalarynyń aldyn alýǵa baǵyttap, kólik qozǵalysynyń barlyq qatysýshylaryna iltıpatpen qaraý kerektigin aıtty.
Kezdesýde aıtylǵan barlyq pikir-usynystardy tyńdaǵan general-maıor kezekshilikke túsetin patrýl polıtseıleriniń ekıpajyn ulǵaıtý máselesin qarastyrýdy tapsyrdy.