Aqmolada júzý bilmeıtin eki qyz týystarynyń kóz aldynda ózenge aǵyp ketti
KÓKShETAÝ. QazAqparat - Aqmola oblysynda Jaltyrkól aýylynan 5 shaqyrym jerde Esil ózenine shomylǵan eki oqýshy qyz sýǵa batyp ketti, dep habarlaıdy QazAqparat.
Qaıǵyly jaǵdaı 19 shilde kúni bolǵan. 12 jáne 15 jasar eki jasóspirim qyz týystarymen birge shomylýǵa arnalmaǵan jerde ózenge túsken.
«Qyzdardyń bireýiniń ákesi olardyń aǵyp bara jatqanyn baıqap qalyp, kómekke umtylǵan. Alaıda qatty aǵys boı bermeı, eki qyzdy aǵyzyp áketken» dep málim etti oblystyq tótenshe jaǵdaılar departamentiniń baspasóz qyzmeti.
Qutqarýshylar eki qyzdyń otbasyna qaıǵyryp kóńil aıtady.
Oblystyń bas qutqarýshysy Alekseı Sovetovtyń aıtýynsha, shomylý maýsymy bastalǵaly óńirde 14 adam sýǵa batyp, kóz jumǵan. Onyń tórteýi - balalar.
«Aqmolalyqtar sońǵy kúnderdegi aptap ystyq kezinde karantınge qaramastan sýǵa túsip jatyr. Shomylý kezinde qaýipsizdik talaptaryn saqtap, barynsha abaı bolý kerek. Mas kúıde shomylýǵa bolmaıdy jáne balalardy qaraýsyz qaldyrmaǵan abzal. Tek qana arnaıy jabdyqtalǵan jerde sýǵa túsińizder. Beıtanys jerde shomylmańyzdar jáne qaltqydan ári aspaǵan durys. Júze almaıtyndar tek qana qutqarýshylar beketi jumys istep turǵan jaǵalaýda, tereńdigi 1,2 metrden aspaıtyn jerde sýǵa tússin. Osy talaptardy saqtaý arqyly ómirińizge qaýip tónbeıdi. Álgi sýǵa ketken eki qyz da júzý bilmeıtin edi» deıdi oblystyq tótenshe jaǵdaılar departamentiniń bastyǵy.
