Aqmolada júk kóligin toqtatpaqshy bolǵan mehanık kóz jumdy

KÓKShETAÝ. QazAqparat - Aqmola oblysynyń Aqsý kentinde isten shyqqan júk kóligin toqtatpaqshy bolǵan 63 jastaǵy mehanık kóz jumdy, dep habarlaıdy QazAqparat tilshisi.

Aqmola oblystyq PD baspasóz qyzmetiniń málimetinshe, 2 aqpanda Stepnogor qalalyq PB kezekshi bólimine 112 operatorynan Aqsý kentindegi jergilikti kásiporynyń boksynda bir adamdy «KamAZ» júk kóligi soǵyp mert qylǵandyǵy týraly habar tústi.

«Anyqtalǵandaı, «KamAZ» júk kóligi bıylǵy jyldyń 25 qańtarynan bastap, 2 aqpany aralyǵynda jóndeýde bolǵan. Aqsý kentiniń turǵyny 55 jastaǵy júrgizýshi jóndelgen kólikti kásiporynnyń aýmaǵynda synaqtan ótkizip, boksqa qoımaqshy bolady. Alaıda, qozǵaltqysh júıesinde tehnıkalyq aqaý shyǵyp, kólik toqtamaı qoıǵan. Osy kezde kólikti toqtatpaqshy bolǵan 63 jastaǵy mehanıkti «KamAZ» júk kóligi boks qabyrǵasyna qysyp tastaıdy. Er adam alǵan jaraqattarynan oqıǵa ornynda kóz jumdy», - dedi vedomstvodan.

Oqıǵanyń mán-jaıy tekserilip jatyr.