Aqmolada joldy kútip ustaýmen aınalasatyn 58 sheneýnik jaýapqa tartyldy

KÓKShETAÝ. QazAqparat - Aqmola oblysynda joldardy kútip ustaýmen aınalasatyn 58 sheneýnik jaýapqa tartyldy, dep habarlaıdy QazAqparat tilshisi oblystyq polıtsııa departamentiniń baspasóz qyzmetine silteme jasap.

Oblystyq PD ákimshilik polıtsııa basqarmasynyń bastyǵy Aslan Qyzbıkenovtyń aıtýynsha, jol-kólik oqıǵalaryn azaıtý jáne joldarda tótenshe jaǵdaılarǵa jol bermeý úshin óńirdiń avtojoldaryn tekserý jumystary únemi júrgiziledi.

«Aqmola oblysy boıynsha avtomobıl joldarynyń uzyndyǵy 18 924 shaqyrymdy quraıdy, onyń ishinde halyqaralyq mańyzy bar - 455 km, respýblıkalyq - 1747 km, oblystyq - 2684,3 km, aýdandyq - 3497,1 km, sharýashylyq - 4322 km jáne kóshe-jol jelisi - 6218,7 km», - dep naqtylady vedomstvodan.

2020 jyldyń jeti aıynda Ákimshilik polıtsııanyń jol-tehnıkalyq ınspektsııasy bólimshelerimen jalpy qoldanystaǵy avtojoldarǵa 661 tekserý júrgizildi.

Bul rette bes myń shaqyrymǵa jýyq jol qamtyldy, al qorytyndysy boıynsha anyqtalǵan kemshilikterdi joıýǵa 600-den astam uıǵarym berildi.

«Aqmola oblysy polıtsııa departamenti Ákimshilik polıtsııa basqarmasynyń qyzmetkerleri avtojoldardy ýaqtyly tazalamaǵany jáne avtomobıl joldaryn qysqy kútip ustaý jónindegi talaptardy, jol qozǵalysy qaýipsizdigin qamtamasyz etýdiń belgilengen qaǵıdalaryn oryndamaǵany jáne kólik quraldarynyń qaýipsiz úzdiksiz qozǵalysyn qamtamasyz etpegeni úshin 58 jaýapty laýazymdy tulǵa ákimshilik jaýapkershilikke tartyldy», - dep atap ótti Aqmola oblystyq PD ákimshilik polıtsııa basqarmasynyń bastyǵy Aslan Qyzbıkenov.

Vedomstvonyń málimetinshe, tehnıkalyq qadaǵalaý jelisine qatysty búgingi tańda azamattardyń kólik quraldaryn qaıta jabdyqtaý boıynsha 231 ótinishi qaraldy jáne kólik quraldarynyń sáıkestigi týraly kýálik berý boıynsha 188 memlekettik qyzmet kórsetildi.