Aqmolada jolda qalyp qoıǵan 16 jolaýshy qutqaryldy
KÓKShETAÝ. QazAqparat - 18 jeltoqsan kúni Astana-Petropavl tasjolynda «Setra» avtobýsy buzylyp, jolaýshylar aıaldaýǵa májbúr boldy, dep habarlaıdy QazAqparat tilshisi tótenshe jaǵdaılar komıtetiniń baspasóz qyzmetine silteme jasap.
«Keshe Astana-Petropavl tasjolynyń 193-shaqyrymynda «Saryaǵash-Petropavl» baǵytymen qatynaıtyn «Setra» avtobýsy buzylyp qalǵan. Borttaǵy 16 jolaýshynyń 14-i - ózbekstandyq, qalǵan ekeýi - Reseı azamattary. Osyǵan baılanysty adamdardy evakýatsııalaý jóninde habarlama kelip tústi. Birjan sal aýdandyq tótenshe jaǵdaılar bólimi men aýdan ákimdiginiń qyzmetkerleri atalmysh azamattardy «Gazel» kóligimen Bulandy aýdany Makınsk qalasynyń temir jol vokzalyna jetkizip tastady. Olar saparyn ári qaraı jalǵastyrady» delingen habarlamada.
Al, aqaýly «Setra» avtobýsy jóndeý úshin jol boıyndaǵy eń jaqyn kempıng alańyna jetkizilgen.
