Aqmolada jol apaty kezinde joǵary kerneýli elektr jelisi zaqymdandy
ASTANA. KAZINFORM — Aqmola oblysynda jol-kólik oqıǵasy kezinde joǵary kerneýli elektr jelisi zaqymdanyp, jeńil avtokólikter úshin aınalma jol uıymdastyryldy, dep habarlaıdy Kazinform tilshisi.
Astrahan aýdany ákimdiginiń málimetinshe, Starokolýton aýyldyq okrýgine qarasty Qoskól aýyly mańyndaǵy respýblıkalyq trassada aldyn ala derek boıynsha 500 kV joǵary kerneýli elektr berý jelisi tireginiń qulaýy saldarynan ol jol bóligine túsken.
— Adam ómiri men qaýipsizdigine tóngen qaýipke baılanysty atalǵan ýchaskede kólik qozǵalysy ýaqytsha toqtatyldy. Qazirgi jaǵdaı jergilikti atqarýshy organdardyń baqylaýynda. Oqıǵa ornynda barlyq tıisti qyzmetter jumys istep jatyr, — dep habarlady vedomstvo.
Polıtsııa departamenti baspasóz qyzmetiniń naqtylaýynsha, jol-kólik oqıǵasy 20 mamyrda «Astana — Atbasar — Jaqsy — Rýzaevka — Sarykól — Qostanaı — RF shekarasy» avtojolynda bolǵan. Apat saldarynan joǵary kerneýli elektr jelisi zaqymdanyp, kólik qozǵalysy ýaqytsha qıyndaǵan.
— Oqıǵa ornynda polıtsııa qyzmetkerleri jol qozǵalysyn rettep, qoǵamdyq tártip pen jol qozǵalysyna qatysýshylardyń qaýipsizdigin qamtamasyz etti. Jeńil avtokólikter úshin jaqyn eldi meken arqyly aınalma jol uıymdastyryldy, — dep tolyqtyrdy polıtsııa.
Oqıǵanyń saldaryn joıý jáne elektr jelisin qalpyna keltirý jumystaryn energetıkalyq uıymdar men jol qyzmetteri júrgizip jatyr. Sonymen qatar kólik júrgizýshisi zańnamaǵa sáıkes jaýapkershilikke tartylǵany aıtyldy.
Aıta keteıik, buǵan deıin Aqmola oblysynda respýblıkalyq mańyzy bar «Astana – Almaty» avtojolynyń 917-946 shaqyrym aralyǵyndaǵy bóliginde ortasha jóndeý jumystary júrgizilip jatqany habarlanǵan edi.
