Aqmolada joǵalǵan 15 jasar qyz astanadaǵy tanysynyń úıinen tabyldy
KÓKShETAÝ. QazAqparat - Aqmola oblysynyń Arshaly aýdanynda joǵalǵan 15 jasar jasóspirim Nur-Sultan qalasyndaǵy tanysynyń úıinen tabyldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, 2020 jylǵy qyrkúıektiń 10-da Arshaly aýdandyq PB kezekshi bólimine jergilikti turǵynnan ótinishi túsken. Áıeldiń sózinshe, onyń 2005 jyly týǵan qyzy úıinen ketip, qaıtyp oralmaǵan.
Jasósipirim týystarymen baılanysqa shyqpaǵan. Jedel izdestirý sharasyna Arshaly aýdandyq PB jeke quramy, jergilikti polıtsııa quramy, krımınaldy polıtsııa bólimi jáne turǵyndar tartyldy.
Olar jaqyn mańdaǵy eldi mekender men orman alqaptarynda izdeý jumystaryn júrgizdi.
«Bir táýlik ishinde jasósipirim Nur-Sultan qalasynan tabylyp, zańdy ókiline qaıtaryldy. Belgili bolǵandaı, jasóspirim óziniń dosynyń úıinde bolǵan. Onyń quqyǵyn buzý boıynsha eshqandaı áreket jasalmaǵan» dep tolyqtyrdy vedomstvodan.
