Aqmolada jemqorlyqqa qarsy jańa joba qolǵa alynady
Memleket basshysy Nursultan Nazarbaev «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna Joldaýynda QR Memlekettik qyzmet isteri jáne sybaılas jemqorlyqqa qarsy is-qımyl agenttigi men Astana qalasynyń ákimdigi birlesip qolǵa alǵan «Astana - adaldyq alańy» jobasyn atap ótken bolatyn. Jobanyń negizgi mindetteri - turǵyndardyń sybaılas jemqorlyqqa qarsy minez-qulyq úlgisin odan ári damytý men jemqorlyq máselesin memlekettik qyzmet kórsetý sapasyn arttyrý arqyly sheshý, turmystyq jemqorlyqty joıý, azamattar jáne bıznes úshin kedergisiz jáne qolaıly jaǵdaılar jasaý, memlekettik organdar qyzmetiniń ashyqtyǵy, aýqymdy qoǵamdyq baqylaý júrgizý.
«Elbasynyń Joldaýyndaǵy mindetterdi júzege asyrý sheńberinde memlekettik organdardyń jumysy turǵyndardyń ál-aýqatyn arttyrýǵa baǵyttalýy tıis. Osy maqsatta Aqmola oblysy boıynsha QR Memlekettik qyzmet isteri jáne sybaılas jemqorlyqqa qarsy is-qımyl departamenti jergilikti organdarmen birlesip, «Sybaılas jemqorlyqsyz óńirler» jobasyn qolǵa alady. Joba kedergisiz orta qalyptastyrýǵa jáne turmystyq jemqorlyqty azaıtýǵa múmkindik beredi», - dep túsindirdi vedomstvodan.
Memlekettik organdardyń basshylarymen kezdesken Aqmola oblysy boıynsha memlekettik qyzmet isteri jáne sybaılas jemqorlyqqa qarsy is-qımyl departamentiniń basshysy Bergen Baspalınov atalmysh joba azamattardyń memlekettik organdarǵa degen senimin arttyryp, sapaly qyzmet kórsetý arqyly memlekettik apparat bedelin nyǵaıtýǵa septigi tıetinin atap ótti.
«Jobany keshendi túrde júzege asyrý úshin kásipkerler, azamattyq sektor jáne BAQ ókilderi tartylatyn bolady», - dep tolyqtyrdy vedomstvodan.