Aqmolada jelige ádepsiz sýretterin jarııalaǵan memqyzmetshiler jaýapkershilikke tartyldy

KÓKShETAÝ. QazAqparat- Aqmola oblysynda áleýmettik jelige talapqa saı emes sýretterin jarııalaǵan memlekettik qyzmetshiler jýapkershilikke tartyldy. Bul týraly óńirlik kommýnıkatsııalar qyzmetinde ótken brıfıngte Aqmola oblysy boıynsha memlekettik qyzmet isteri jáne sybaılas jemqorlyqqa qarys is-qımyl departamenti basshysynyń orynbasary Darhan Haırýllın málim etti, dep habarlaıdy QazAqparat tilshisi.

Onyń aıtýynsha, memlekettik qyzmetshilerdiń ádebine qatysty 2017 jyly 14 otyrys ótip, onda 86 másele qaralǵan. Onyń ishinde kóbi jemqorlyqqa qarsy is qımyl jáne memlekettik qyzmet týraly zańnamany aldyn alý sharalary tóńireginde boldy. Oǵan qosa, tártiptik isterdi qaraý qorytyndysy boıynsha 22 laýazymdy tulǵa tártiptik jaýapkershilikke (5 -memlekettik qyzmetiniń abyroıyna nusqan keltirý, 17- Ádep kodeksin buzý) tartyldy.

Memlekettik qyzmet týraly zańnama men Ádep kodeksiniń saqtalýyn baqylaý maqsatynda 88 tekseris júrgizildi. Sonyń nátıjesinde 39 zańnama buzýshylyqty joıý týraly usynys jasaldy. Shaǵymdanǵan  31 azamattyń quqyǵy qorǵaldy. Oǵan qosa, 10 tártiptik is qozǵaldy.

 

Al, 2017 jyldyń naýryz jáne tamyz aılary aralaǵynda memlekettik qyzmetshilerdiń áleýmettik jelilerindegi 4 myń jeke paraqshalaryna júrgizilgen  monıtorıngtiń qorytyndysyna saı áshkerleıtin minezde 270 sýret anyqtaldy.

«Olar memlekettik qyzmetshiniń shetelde demalý sáti, kóńil kóterý oryndarynda alkogoldik ishimdikter jáne qarý beınelengen sýretteri. Osyǵan memlekettik mekemelerge aqparat hat joldanyp, sýretter memlekettik qyzmetshilerdiń áleýmettik jelilerdegi jeke paraqshalarynan alynyp tastaldy.  Onyń ishinde 17 memlekettik qyzmetshi jaýapqa tartyldy», dep túsindirdi Darhan Haırýllın.