Aqmolada «Jasyl el» eńbek jasaǵynyń kezekti maýsymy máresine jetti

Kókshetaýdaǵy Orys drama teatrynda ótken jastar jáne stýdenttik eńbek jasaqtarynyń  oblystyq  «Jasyl el» shtaby eńbek maýsymynyń jabylý rásiminde qorshaǵan ortany jasyl-jelekke aınaldyryp, aımaq ekologııasyna úles qosqan eńbek jasaqtarynyń jumysy qorytyndylanyp, úzdikter marapattaldy.

Sharaǵa oblystyq jastar saıasaty məseleleri basqarmasynyń basshysy Tımýr Ysqaqov, memlekettik jáne jergilikti atqarýshy organdardyń, jastar uıymdarynyń ókilderi, «Jasyl el» oblystyq jáne qalalyq shtabtarynyń basshylary men menedjerleri, jastar eńbek jasaqtarynyń sarbazdary qatysty.

«Elbasy Nursultan Nazarbaevtyń bastamasymen «Jasyl el» baǵdarlamasynyń qolǵa alǵanyna 14 jyl boldy. Osy aralyqta jastar eńbek jasaqtary men ekologııalyq otrıadtar aımaqty kógaldandyrý jáne abattandyrý jumystaryna atsalysty. Aqmola oblysyndaǵy eńbek jasaqtary men ekologııalyq respýblıkalyq sharalarǵa belsendi qatysty. Bıyl «Baldáýren» respýblıkalyq oqý-saýyqtyrý ortalyǵynda «Jasyl el» jastar eńbek jasaqtarynyń 14-shi respýblıkalyq eńbek maýsymynyń ashylýy kóp nárseni ańǵartady», - dedi Tımýr Ysqaqov.

Sonymen qatar, saltanatty sharada bıylǵy eńbek maýsymynda belsendilik tanytyp, kózge túskender «Úzdik otrıad», «Úzdik komandır», «Úzdik sarbaz» jáne «Úzdik jastar resýrstyq ortalyǵy» atalymdary boıynsha marapatqa ıe boldy.

Sharada aıtylǵandaı, bıyl «Jasyl el» baǵdarlamasy arqyly jastardy jumysqa ornalastyrý boıynsha Aqmola oblysynyń tabıǵı resýrstar jáne tabıǵat paıdalanýdy retteý basqarmasynyń  12 orman sharýashylyǵy qatysty. Budan bólek, «Musabaev A.E.» JK, Býrabaı aýdanyndaǵy «Tazalyq servıs» kommýnaldyq kásiporny, Jaqsy aýdanyndaǵy «Plastık stroı» JK, Shortandy aýdanyndaǵy «Ysqaqov N.N» JK, «Egindikól jastary» JQB, Stepnogor qalasyndaǵy «Qurylys MTK» JShS, Kókshetaý qalasyndaǵy «Kókshetaý DEÝ» JShS jáne «Kókshe-Tazalyq» JShS tárizdi kásiporyndar úles qosty.