Aqmolada jarylǵan muzda qalyp qoıǵan balyqshy qutqaryldy
EREIMENTAÝ. QazAqparat - Aqmola oblysynda muz aralynda qalǵan balyqshy qutqaryldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimeti boıynsha, oqıǵa Ereımentaý aýdanynda bolǵan. Naýryz aıynyń 25-i kúni Stepnogor qalasynyń turǵyny, 75 jastaǵy zeınetker Leonıd Rıaboshapko óziniń jeke kóligimen Siletti sý qoımasyna balyq aýlaýǵa barǵan. Tórt kún boıy sý qoımasyndaǵy muzdyń ústinde balyq aýlaǵan zeınetker 29 naýryzda úıine qaıtpaq bolady. Tańerteń turǵan ol óziniń muz erip, jaǵaǵa jaqyn jerdegi «Qunaı» aralynda turǵanyn baıqaıdy.
Leonıd Ivanovıch taǵy birneshe kún aralda turýǵa májbúr bolady. Tek úrlemeli qaıyqtyń kómegimen jaǵaǵa baryp, joldasy ákelgen azyq-túlik pen kıim-keshekterin alyp turǵan.
Zeınetkerdiń sózine qaraǵanda, avtokóligin qaraýsyz qaldyrǵysy kelmegen. Alaıda, zeınetkerdiń júrek dertimen aýratyndyǵy jáne kardıostımýlıator qoldanatyndyǵy qutqarý jumystaryn shuǵyl júrgizýdi talap etti.
«Jergilikti atqarýshy organdardyń qoldaýymen polıtseıler qutqarý sharalaryn júzege asyrdy. Buǵan jergilikti turǵyndar da jumyldyryldy. Nátıjesinde demalys oryndarynyń kateri men qoldan jasalǵan saldyń kómegimen Leonıd Ivanovıch pen onyń avtokóligi jaǵaǵa shyǵaryldy.
Osyǵan oraı, Leonıd Ivanovıch ózin jáne avtokóligin muz qursaýynan qutqarǵan PB bastyǵy Kelden Syzdyqov bastaǵan ereımentaýlyq polıtseılerge alǵysyn bildirdi», - deıdi vedomstvonyń baspasóz qyzmetindegiler.
