Aqmolada jabylǵan jol ýchaskesin aınalyp ótpek bolǵan kólik sýǵa batyp ketti

ASTANA. KAZINFORM — Qutqarýshylar kólik ishinde júrgizýshimen birge bolǵan eki jolaýshyny sýdan aman alyp shyqty, dep habarlaıdy Kazinform tilshisi.

Aqmola oblysy Polıtsııa departamentiniń málimetine sáıkes jol qozǵalysyna shekteý qoıylǵanyna qulaq aspaı ótip ketken kólikti sý aǵyzyp áketken.

— 5 sáýirde «Astana — Atbasar — Jaqsy — Rýzaevka — Sarykól — Qostanaı —RF shekarasy» avtojolynyń 963-shaqyrymyn sý shaıyp ketýine baılanysty avtokóliktiń barlyq túri úshin jol qozǵalysyna shekteý engizilip, blok-beket qoıyldy. Degenmen júrgizýshi tyıym salynǵanyna qaramastan, blok-beketti aınalyp ótip ketti. Alaıda sý basqan ýchaskeni ótip jatqan kezinde ony sý aǵyzyp áketip, kólik sý astyna ketti, — delingen habarlamada.

Kólikte úsh adam bolǵan. Olardyń ekeýin qutqarýshylar men polıtseıler aman alyp qaldy. Zardap shekkenderge medıtsınalyq kómek tolyq kólemde kórsetilip jatyr. Al júrgizýshiniń denesi 02:30 shamasynda tabyldy.

— Polıtsııa jáne tótenshe jaǵdaılar qyzmetkerleri qazaqstandyqtarǵa úndeý joldap, qaýipsizdik sharalaryn qatań saqtaýdy jáne shekteý engizilgen sý tasqyny qaýpi bar jol ýchaskelerinen ótpeýdi surady, — delingen habarlamada.

Aıta keteıik, keshe Eraly Toǵjanov Aqmolanyń Bulandy aýdanyndaǵy sý tasqyny qaýpi bar aýmaqtardy aralaǵany málim boldy.