Aqmolada zańsyz uıymdastyrylǵan 16 oıyn bıznesiniń joly kesildi
KÓKShETAÝ. QazAqparat – Aqmola oblysynda memlekettik baǵdarlamalar boıynsha bólingen bıýdjet qarajatyn maqsatsyz jumsaýǵa qatysty 29 qylmystyq is boıynsha 22 mıllıon teńge kóleminde shyǵyn keltirilgeni anyqtaldy.
Onyń 16 mıllıon teńgesi sotqa deıingi tergeý amaldary kezinde qaıtaryldy. Bul týraly jýrnalıstermen ótken brıfıngte Aqmola oblysy boıynsha ekonomıkalyq tergeý departamenti basshysynyń orynbasary Jandos Smatov aıtty, dep habarlaıdy QazAqparat tilshisi.
«Aǵymdaǵy jyly departamenttiń qaraýynda sotqa deıingi 59 tergeý isi boldy. Onyń ishinde 22 is nemese 37 paıyzy ekonomıkalyq salaǵa qatysty. Sotqa deıingi 32 is sotqa joldanyp, belgili sebeptermen toqtatyldy», - deıdi J.Smatov.
Sonymen qatar, departament basshysynyń orynbasary óńirde zańsyz oıyn bıznesimen kúresý sharalaryna toqtaldy.
«Jedel izdestirý kezinde Kókshetaý qalasy, Stepnogorsk qalasynyń Bestóbe kenti jáne Tselınograd aýdanynyń Qosshy men Qarótkel aýyldarynda zańsyz jumys istep turǵan 16 oıyn bıznesi mekemesiniń jol kesildi. Onyń 7 býkmekerlik keńsesinde «elektrondy kazıno» jumys istegen. Qumar oıyn qosymshasy bar 22 sary-jasyl oıyn termınal tárkilendi. Tekserý kezinde 2 mıllıon teńge kóleminde aqsha, televızor, noýtbýk, monıtor jáne ózge de kompıýter tehnıkalary alyndy. Osy rette, ekonomıkalyq tergeý departamenti QR qoldanystaǵy zańamasynda belgilengen jerden tys, zańsyz qumar oıynyn uıymdastyrǵan, ashqan jáne ótkizgen tulǵaǵa 5 050 000 teńge kóleminde aıyppul nemese múlkin tárkileı otyryp, eki jylǵa bas bostandyǵynan aıyrý jazasy taǵaıyndalatynyn eskertedi», - deıdi J.Smatov.
