Aqmolada uıymdasqan qylmystyq top 450 tulǵaǵa zańsyz nesıe rásimdegen
ASTANA. KAZINFORM — Aqmola oblysynyń prokýrorlary 450 tulǵaǵa zańsyz nesıe rásimdegen uıymdasqan qylmystyq toptyń áreketin toqtatty, dep habarlaıdy oblystyq prokýratýranyń baspasóz qyzmeti.
Ótken jyldyń sáýir aıynda Zerendi aýdanynyń prokýrorymen aýdan halqymen kezdesý barysynda, belgisiz tulǵalarmen áleýmettik osal toptaryna jatatyn aýdan turǵyndarynyń atyna aqshalaı nesıe rásimdeý faktisi anyqtalǵan. Osyǵan oraı, aýdan prokýrorynyń bastamasymen jedel izdestirý sharalary bastalǵan. Nátıjesinde 2024 jyldyń qarasha aıynda alaıaqtyq deregi boıynsha qylmystyq is qozǵalyp, tergep-tekserý Aqmola oblysy prokýratýrasynyń arnaıy prokýrorlaryna júktelgen.
— Sotqa deıingi tergep-tekserý barysynda uıymdasqan qylmystyq top anyqtalyp, onyń músheleri aldaý jolymen ekinshi deńgeıli bankterden aqsha qarajattaryn jymqyrǵany áshkerelendi. Top músheleriniń árbir qatysýshynyń rólderi, mindetteri jáne áreketteri naqty bólingen. Alaıaqtar 450 tulǵanyń atynan 5 mlrd teńge shamasynda zańsyz nesıe rásimdegen. Saldarynan elimizdiń birneshe oblysynyń turǵyndary alaıaq qurbanyna aınalǵan. Qazir qylmystyq is boıynsha 24 tulǵa kúdikti dep tanylyp, onyń 15-i sot sanktsııasymen qamaqqa alyndy. Tergep-tekserý jalǵasyp jatyr. QPK-tiń 201-babynyń 1-bóligine sáıkes, ózge málimetter jarııalanbaıdy, — delingen habarlamada.
Osydan buryn Aqmola oblysynda 3 jyl boıy alıment tóleýden qashyp júrgen boryshker jazalanǵanyn jazdyq.