Aqmolada úı-kúısiz júrgen 400-den astam adam beıimdeý ortalyǵyna jetkizildi
Vedomstvonyń málimeti boıynsha, qatty aıazǵa baılanysty Aqmola oblysynyń polıtseıleri úı-kúısiz júrgen adamdardy anyqtaýǵa kirisken.
Máselen, Kókshetaý qalalyq Polıtsııa basqarmasynyń qabyldaý-bólý qyzmetkerleri turǵylyqty mekenjaıy joq tulǵalardy anyqtaý boıynsha qudyq, jylý qubyrynyń boıy jáne qaraýsyz qalǵan ǵımarattardy aralaýda. Búgingi kúni sot sheshimimen 40 adam qabyldaý-bólý mekemesine jaıǵastyrylyp otyr. Al jyl basynan beri atalmysh mekemege 140 adam jetkizilgen. Polıtseıler turǵylyqty mekenjaıy joq tulǵalardyń aty-jóni men qylmystarǵa qatysy bar-joǵyn da anyqtaýda.
Sonymen qatar, Kókshetaýda úısiz júrgen adamdardyń túneıtin bólimshe de jumys isteıdi. Jergilikti áleýmettik beıimdeý ortalyǵy aıazda turǵylyqty mekenjaıy joq tulǵalardyń panalaıtyn jalǵyz orny. Munda ystyq tamaq, jatyn oryn usynylady. Biraq, soǵan qaramastan keıbir adamdar aıazdy kúnderi de qashyp, erkin júrgendi qalaıdy.
Jyl basynan beri polıtseıler men áleýmettik beıimdeý ortalyǵynyń qyzmetkerleri birlesip «Áleýmettik patrýl» mobıldik qyzmetin qolǵa aldy. Osynyń nátıjesinde 406 adam áleýmettik beıimdeý ortalyǵyna jetkizilgen.
Aıta ketý kerek, Kókshetaý qalasynda qańǵybastar sany jyldan jylǵa azaıyp keledi. Ótken jyly, 173 qańǵybas qabyldaý-bólý mekemesine jetkizilse, bıylǵy jyly 30 adamǵa kemip otyr.
«...Aıazdy kúnderi polıtsııa qyzmetkerleri turǵylyqty mekenjaıy joq tulǵalardy izdestirý boıynsha jumystardy júrgizýde. Bul adamdardyń arasynda iz-túzsiz joǵalǵandar, qylmysqa qatysy bar-joǵy anyqtalady. Keıin qujaty joqtar qabyldaý-bólý mekemesine, al qujaty barlar Kókshetaý qalasynyń áleýmettik beıimdeý ortalyǵyna jiberiledi», - deıdi Kókshetaý qalasy jergilikti polıtsııa qyzmetiniń qabyldaý-bólý mekemesi bastyǵynyń orynbasary Suńǵat Tleýkın.
