Aqmolada úsh kún buryn joǵalǵan azamattyń denesi ózen jaǵasynan tabyldy

KÓKShETAÝ. KAZINFORM — Polıtseıler iz-túzsiz joǵalǵan jigittiń denesi tabylǵan soń qylmystyq is qozǵady.

Jaqsy aýdanyndaǵy Qıma aýylynyń turǵyndary iz-túzsiz joǵalǵan 42 jastaǵy aýyldasyn úsh kún boıy izdegen.

Aqmola oblystyq polıtsııa departamenti baspasóz qyzmetiniń habarlaýynsha, er adam 30 qarashada úıinen shyǵyp ketken, sol ýaqyttan beri onyń qaıda ekeni belgisiz bolǵan. Іzdestirý jumystaryn polıtsııa qyzmetkerleri, eriktiler jáne týystary júrgizdi.

— Іz-tússiz joǵalyp ketken Qıma aýylynyń 1983 jyly týǵan turǵynyn izdestirý barysynda onyń denesi Esil ózeniniń jaǵasynan tabyldy. Aldyn ala málimet boıynsha ólimge sýǵa batý kezinde tynys alý jolynyń sýmen bitelýi saldarynan tunshyǵý sebep bolǵan, — dep habarlady vedomstvo.

Er adamnyń máıiti tabylǵan soń qylmystyq is qozǵaldy. Oqıǵanyń barlyq mán-jaıyn anyqtaý úshin sotqa deıingi tergeý amaldary júrgizilip jatyr.

Osyǵan deıin Pavlodarda iz-túzsiz joǵalǵan er adamnyń denesi ózennen tabylǵan bolatyn.