Aqmolada úsh bıge eskertkish ornatylyp, Jeti jarǵy kóshesi ashyldy

KÓKShETAÝ. QazAqparat - Aqmola oblysynyń Tselınograd aýdanynda aýdandyq sot ǵımaraty aldynda qazaq halqynyń tóbe bılerine arnalǵan «Úsh bı» eskertkishi jáne Aqmol aýylynda Jeti jarǵy kóshesi ashyldy, dep habarlaıdy QazAqparat tilshisi oblystyq sottyń baspasóz qyzmetine silteme jasap.

Vedomstvonyń málimetinshe, eskertkish jáne kósheniń ashylý saltanatyna aýdan turǵyndary, sot júıesiniń, ákimdiktiń, aýdandyq máslıhattyń ókilderi, quqyq qorǵaý organdarynyń, prokýratýra, jergilikti memlekettik organdardyń, bıznes qurylymdarynyń basshylary, eńbek jáne sot júıesiniń ardagerleri qatysty. Atalǵan is-shara aýdan jáne oblys úshin mańyzdy oqıǵa bolyp otyr.

Saltanatty sharada Aqmola oblystyq sotynyń tóraǵasy Dosjan Ámirov, QR Joǵarǵy Soty janyndaǵy sottardyń qyzmetin qamtamasyz etý departamentiniń aqparattyq qamtamasyz etý bólimi meńgerýshisiniń orynbasary Núrgúl Qaraǵoıshına, «Tselınogradskoe» kredıttik seriktestigi» JShS-niń basqarma tóraǵasy, Qoǵamdyq keńes tóraǵasy Saǵdat Áshebekov, aýdan ákiminiń orynbasary Alma Aıtqojınova jáne Tselınograd aýdandyq sotynyń tóraǵasy Tólegen Turǵambaev quttyqtaý sóz sóıledi.

Aqmola oblystyq sotynyń tóraǵasy Dosjan Ámirovtiń aıtýynsha, úsh júzdiń bas bıine ornatylǵan eskertkish «birliksiz ulttyń tutastyǵy, al danalyqsyz eldiń damýy múmkin emestigin» eske salyp turady.

«Tóle, Qazybek jáne Áıteke bılerge arnalǵan eskertkishter osy eldimekendegi jurtshylyqtyń kózin qýantyp, jıi keletin súıikti orynǵa aınalady. Qazaq halqynyń birigýine jáne memleket tutastyǵyn saqtaý jolynda ter tókken qaıratkerlerdi óskeleń urpaq biletin bolady. «Úsh bı» eskertkishi danalyqty jáne turaqtylyqty beınelep, maqtanysh, kúsh pen erlikti sondaı-aq birlikpen, myqty memleketti jáne ádil qoǵamdy aıshyqtap turady», - dep atap ótti Dosjan Ámirov.

Aýdandaǵy ekinshi mańyzdy oqıǵa - Jeti jarǵy kóshesiniń ashylýy. Aqmol aýylyndaǵy bul kóshe 15-19 ǵasyrlardaǵy handyq dáýirde qabyldanǵan, qazaq quqyǵynyń bastaýynda turǵan «Jeti jarǵy» zańdar jınaǵynyń atymen atalǵan. Atalǵan zań Táýke han tusynda jeti bólimnen qurylyp, memlekette quqyqtyq qatynasty rettegen birinshi Ata zań boldy.

«Búgingi tańda oblysta 13 kóshe jáne bir kentke qazaq bıleriniń esimi berilip, osy arqyly qazaq halqynyń tarıhy jańǵyrtyldy. Atalǵan jumys Qazaqstan Respýblıkasy Joǵarǵy Sotynyń basshylyǵymen Elbasynyń «Bolashaqqa baǵdar: rýhanı jańǵyrý» jáne «Uly dalanyń jeti qyry» atty baǵdarlamalyq maqalalarynyń negizgi qaǵıdalaryn iske asyrý maqsatynda júrgizilýde» - deıdi Dosjan Ámirov.