Aqmolada ulttyq tabıǵı park velosıpedti úsh ese qymbat baǵaǵa satyp almaq boldy

KÓKShETAÝ. QazAqparat - Aqmola oblysyndaǵy «Kókshetaý» memlekettik ulttyq tabıǵı parki velosıpedti kóterińki baǵamen satyp almaq bolǵany anyqtaldy, dep habarlaıdy QazAqparat tilshisi Aqmola oblysy boıynsha sybaılas jemqorlyqqa qarsy is-qımyl departamentiniń baspasóz qyzmetine silteme jasap.

Vedomstvonyń málimetinshe, bıýdjet qarajatynyń maqsatty jáne tıimdi paıdalanylýyn baqylaý sheńberinde departament qyzmetkerleri «Biryńǵaı satyp alý terezesi» aqparattyq-taldaý júıesi arqyly memlekettik satyp alýǵa monıtorıng júrgizdi.

Taldaý barysynda satyp alý baǵasynyń medıandyq baǵadan asyp ketý faktileri anyqtaldy, olar boıynsha tapsyrys berýshilerdiń atyna memlekettik organdar men kvazımemlekettik sektor josparlaǵan taýarlarǵa, jumystar men qyzmetterge ońtaıly baǵalardy qaıta qaraý jáne belgileý usynystarymen tıisti hattar joldandy.

«Stepnogor qalasynyń turǵyn úı-kommýnaldyq sharýashylyq, jolaýshylar kóligi, avtomobıl joldary jáne turǵyn úı ınspektsııasy bóliminiń janyndaǵy «Stepnogorsk-vodokanal» kásiporny sýmen jabdyqtaý úshin polıetılen qubyrynyń qunyn tómendetý jolymen 5 502 336 teńge únemdedi. Ony satyp alý bastapqyda jalpy somasy 28 800 000 teńgeden nemese bir danasy úshin 30 000 teńgeden josparlanǵan bolatyn» dep habarlady departamenttiń baspasóz qyzmeti.

Sonymen birge, «Kókshetaý» memlekettik ulttyq tabıǵı parki velosıpedti jalpy somasy 1 936 407 teńgege nemese bireýin 387 281 teńgeden satyp alýdy josparlaǵan. Al velosıpedtiń ortasha naryqtyq baǵasy - 107 000 teńge.

«Departament qyzmetkerleriniń usynystarynan keıin uıym memlekettik satyp alý baǵasyn tómendetti. Taýardy satyp alýǵa josparlanǵan shyǵynnyń únemdelýi shamamen 972 120 teńgeni qurady. Monıtorıngtiń arqasynda mekeme únemdelgen bıýdjet qarajatyna qosymsha velosıped satyp alýdy josparlap otyr», - deıdi vedomstvonyń baspasóz hatshysy Dınara Nurtaz.