Aqmolada ulttyq sport túrlerinen el chempıonatynyń jeńimpazdary anyqtaldy
KÓKShETAÝ. QazAqparat - Kókshetaýda kókpar, aýdaryspaq, teńge ilý jáne jamby atý sııaqty ulttyq sport túrlerinen Qazaqstan chempıonaty ótti, dep habarlaıdy QazAqparat tilshisi Aqmola oblysynyń dene shynyqtyrý jáne sport basqarmasynyń baspasóz qyzmetine silteme jasap.
Krasnoıar kentindegi ulttyq sport túrleri boıynsha Aqmola oblystyq balalar men jasóspirimderdiń sport mektebine ataqty Balýan Sholaqtyń esimi berilýine oraılastyrylǵan jarysqa elimizdiń ár óńirinen kelgen 200-ge jýyq sportshy qatysyp, baq synady. At qulaǵynda oınaǵan jigitterdiń tartysy «Qulager» atshabarynda ótti.
Ulttyq sporttyń barlyq túrleri boıynsha synǵa túsken aqmolalyq sportshylar jaqsy nátıje kórsetti. Onyń ishinde Rýslan Bilálov jamby atýdan, Ahmedvalıı Ábdiǵalı teńge alýdan úshinshi oryndarǵa turaqtasa, arshalylyq Vıktor Tımofeev 70 keliden joǵary salmaqtaǵylar arasynda aýdaryspaqtan jarys jeńimpazy atandy.
Sonymen qatar, osy sport túri boıynsha 50 keli salmaqta Jasulan Maǵjanov ekinshi, 40 keli salmaqta Shııap Jantóre men 70 keli salmaqta Sovet Ashat úshinshi oryndarǵa laıyq dep tanyldy.
«Bul meniń ekinshi jeńisim. Ótken jyly Shymkent qalasynda ótken jarysta top jarǵan bolatynmyn. On jastan bastap at qulaǵynda oınap kelemin. Al aýdaryspaqpen osymen úshinshi jyl aınalysyp kelemin. Maǵan qatty unaıdy. Naǵyz erlerdiń sporty» deıdi Vıktor Tımofeev.
Jalpy, jarys qorytyndysy boıynsha komandalyq esepte Túrkistan oblysy birinshi, Aqmola oblysy ekinshi jáne Jambyl oblysy úshinshi oryndardy enshiledi.
