Aqmolada ulyn urǵan áke 100 saǵat qoǵamdyq jumysqa tartyldy
ASTANA. KAZINFORM — Aqmola oblysynyń Sandyqtaý aýdandyq soty kámeletke tolmaǵan ulyna kúsh qoldanǵan er adamǵa 100 saǵat qoǵamdyq jumysqa tartý jazasyn taǵaıyndady. Sottalýshy kinásin moıyndap, jasaǵan áreketine ókingen.
Sot materıaldaryna sáıkes, oqıǵa ákesi men 2015 jyly týǵan ulynyń úıde bolǵan kezinde týyndaǵan janjaldan bastalǵan. Janjal barysynda er adam balasynyń keýdesindegi kıiminen ustap, qulaǵynan alaqanymen uryp, ıterip jibergen.
Sotta ákesi kinásin tolyq moıyndaǵan. Al kámeletke tolmaǵan bala ákesin keshirip, ony jazalamaýdy suraǵan. Ol janjalǵa ózin kináli sanaıtynyn aıtyp, qazirgi ýaqytta ońaltý ortalyǵynda júrgendikten, úıine oralǵysy keletinin jetkizgen.
Baladan sotta pedagog pen psıhologtyń qatysýymen jaýap alynǵan. Jábirlenýshiniń qorǵaýshysy taraptardyń tatýlasýyna baılanysty qylmystyq isti toqtatýdy suraǵan. Alaıda balanyń zańdy ókili men qorǵanshylyq jáne qamqorshylyq jónindegi maman buǵan qarsy bolǵan.
Pedagog-psıholog balanyń minez-qulqyna ata-anasynyń tıisti kóńil bólip, tárbıesi men baqylaýyn qamtamasyz etýi qajet ekenin atap ótken. Sotta synyp jetekshisi de ákesiniń balasynyń ómirine aralasyp, ata-analar jınalysyna qatysatynyn jáne oqý úlgerimine qyzyǵýshylyq tanytatynyn aıtqan.
Sot qandaı sheshim shyǵardy?
— Sot taraptardyń tatýlasýyna baılanysty isti toqtatý týraly ótinishti qanaǵattandyrmady. Óıtkeni qylmystyq quqyq buzýshylyq kámeletke tolmaǵan balaǵa qatysty kúsh qoldanýmen baılanysty bolǵan. Jaza taǵaıyndaý kezinde sottalýshynyń kinásin moıyndap, ókingenin, balanyń ákesin keshirgenin, dene jaraqattary densaýlyqqa zııan keltirmegenin jáne er adamnyń materıaldyq jaǵdaıyn eskerdi. Nátıjesinde Q.-ǵa 100 saǵat qoǵamdyq jumysqa tartý jazasy taǵaıyndaldy, — delingen habarlamada.
Sot aktisi ázirge zańdy kúshine engen joq.
Budan buryn polıtsııa balabaqshada balalardy oryndyqqa baılap, urǵandarǵa qatysty qylmystyq is qozǵaǵany aıtyldy.
