Aqmolada týrızm bıznesin qoldaý boıynsha membaǵdarlama qalaı júzege asyp jatyr
KÓKShETAÝ. KAZINFORM - Aqmola oblysynda týrızm salasyndaǵy bıznesti qoldaý men damytýdyń memlekettik baǵdarlamasy qalaı júzege asyp jatyr? Agenttik tilshisi press-týr aıasynda birqatar nysandy aralap qaıtty.
Aqmola oblysynyń tabıǵaty týrızmdi damytýǵa óte qolaıly. Salaǵa úkimet tarapynan da qoldaý kórsetilip otyr. Óńirdegi týrızm salasynda qyzmet usynatyn kásipkerlik sýbektileri shyǵyndarynyń bir bóligin memlekettik sýbsıdııa esebinen japqan. Sońǵy eki jyl ishinde osy baǵyttaǵy 17 kásipker jalpy somasy 119,7 mıllıon teńge memlekettik qoldaý sharalaryna ıe boldy.
«2022 jyldyń 1 qańtarynan bastap kásipkerlik sýbektileri shyǵyndarynyń bir bóligin sýbsıdııalaý qaǵıdalary kúshine endi. 2022 jyly 14,6 mıllıon teńgege 5 ótinim qoldaý tapsa, ótken jyldyń qorytyndysy boıynsha bul kórsetkish 10 ótinimge artyp, sýbsıdııa kólemi 105,1 mıllıon teńge boldy. Kásipkerler úshin týrızm salasynda bıznesti damytýda memlekettik qoldaýdyń paıdasy óte zor», - dep atap ótti jýrnalısterge uıymdastyrylǵan baspasóz týry barysynda Aqmola oblysy týrızm basqarmasynyń baspasóz hatshysy Aıajan Omar.
Sonyń ıgiligin kórip otyrǵandardyń biri - Kókshetaý qalasynda qonaq úı jáne meıramhana qyzmetin usynatyn jeke kásipker K. Beksultanova.
«Eki jyl ishinde jalpy somasy 82,5 mln teńgege «Volkswagen Crafter» shaǵyn avtobýsy jáne «Yutong» avtobýsyn satyp alsaq, onyń 25 paıyzy sýbsıdııa esebinen óteldi. Bul - biz úshin úlken qoldaý», - deıdi Kógershin Beksultanova.
Sonymen birge, «Forest Camp» oteli jáne «Discovery Borovoe» demalys ortalyǵy da memleket tarapynan qoldaý taýyp otyr.
Býrabaı aýdanynda ornalasqan nysan ıesi saýyqtyrý jáne oıyn-saýyq ortalyǵynda hokkeı korty men basseıni bar jazǵy terrassany salý kezinde shyǵyndardyń bir bóligin óteýge ótinish bergen.
«Osy nysandardyń qurylysyna 165,4 mln teńge qarjy jumsasaq, onyń 16,5 mln teńgeden astamy sýbsıdııa retinde óteldi», - deıdi «Orlenok» JShS dırektorynyń orynbasary, Aqmola oblystyq máslıhatynyń depýtaty Pavel Bezverbnyı.
Onyń aıtýynsha, týrızm - óńir ekonomıkasynyń qarqyndy damyp kele jatqan mańyzdy bir salasy. Şýche-Býrabaı kýrorty elimizdegi týrıstik áleýeti zor aımaq sanalady. Memlekettik qoldaýdyń arqasynda týrıster men demalýshylarǵa kórsetiletin qyzmet túrleri aıtarlyqtaı keńeıe túsken.
Óńirde demalys aımaqtarynyń paıda bolýy, týrısterdi tartýǵa zor úles qosady. Osydan birer jyl buryn Birjan sal aýdanyndaǵy Júkeı qóliniń jaǵasynda ashylǵan «Orman jáne juldyz» demalys aımaǵy sonyń bir aıǵaǵy ispettes. Ortalyq memlekettik qoldaýdyń arqasynda týrıstik qyzmet kórsetý sapasyn arttyryp keledi.
Aıta ketsek, budan buryn qysqy Býrabaı teńdessiz ásem tabıǵatymen kóz tartatynyn jazǵan edik.
