Aqmolada týberkýlezben kúreske 2 mlrd teńgeden astam qarjy jumsalmaq
KÓKShETAÝ. QazAqparat - 2019 jyly Aqmola oblysynda týberkýlezben kúreske 2 mıllıard teńgeden astam qarjy jumsalady, dep habarlaıdy QazAqparat tilshisi «Áleýmettik medıtsınalyq saqtandyrý qory» Aqmola oblystyq fılıalynyń baspasóz qyzmetine silteme jasap.
Vedomstvonyń deregi boıynsha, Qazaqstanda týberkýlezdi anyqtaý, aldyn alý jáne emdeý tegin medıtsınalyq kómektiń kepildik berilgen kólemine kiredi jáne bul keseldi emdeý tegin júrgiziledi. 2019 jyly memlekettik bıýdjetten týberkýlezben aýratyn naýqastarǵa dıagnostıka, emdeý jáne áleýmettik kómek kórsetý úshin 47,7 mıllıard teńge bólindi. Aqmola oblysynda bul qarajat - eki mıllıard teńgeden astam.
«Q.Qurmanbaev atyndaǵy Aqmola oblystyq týberkýlezge qarsy kúres dıspanseriniń resmı statıstıkasyna sáıkes, 2018 jyly dıspanserde 623 adam emdelse, onyń ishinde 18 jasqa deıingi 25 bala bar. Al, 274-si - belsendi týberkýlezben aýyratyndar. 2018 jyly 419 naýqasqa alǵash ret dıagnoz qoıyldy. 2017 jylmen salystyrǵanda 757 adam tirkeldi. Aımaqtaǵy aýrýǵa shaldyǵý deńgeıin tómendetýge jaqsy serpin bergen joba - flıýorografııalyq saraptama arqyly joǵary táýekel tobynyń 100 paıyz qamtamasyz etilýin anyqtaý boldy. Bul jyl saıyn aımaqtaǵy turǵyndardyń ýaqytyly flıýorografııadan ótýin qamtamasyz etedi. 2018 jyly jospar 423382 adam bolsa, onyń 422961 zertteldi», - deıdi «Áleýmettik medıtsınalyq saqtandyrý qory» Aqmola oblystyq fılıalynyń baspasóz qyzmetindegiler.
Sonymen qatar, óńirde balalarǵa ekpe egý problemalary da joq emes. Ata-anasynyń bas tartýy saldarynan 138 balaǵa BTsJ ekpe egilmedi. 2018 jyly týberkýlezden 12 adam kóz jumdy, 2017 jyly bul kórsetkish 24 adamdy qurady.
«2016 jyldan bastap oblysta týberkýlezge qarsy jańa preparattar men qysqa merzimdi emdeý engizilip, týberkýlezdi emdeý merzimi 20 aıdan 12 aıǵa deıin qysqartyldy. Jahandyq qordyń jáne «Seriktester densaýlyq úshin seriktester» halyqaralyq uıymynyń pılottyq jobalary sheńberinde dárilikke tózimdi týberkýlezdi erterek dıagnostıkalaý jáne emdeý boıynsha birqatar sharalar qabyldandy. Bul ambýlatorııalyq emdeýdiń tıimdiligin arttyryp, naýqasty emdeýdegi úzilisterdiń sany 0,8 paıyzǵa deıin tómendedi, emdeý tıimdiligi DDU usynǵan 85 paıyzdan asty», dep tolyqtyrdy vedomstvodan.
