Aqmolada tok soǵyp kóz jumǵan balanyń qasynda taǵy bir oqýshy bolǵan
KÓKShETAÝ. QazAqparat - Aqmola oblysynyń Atbasar qalasynda tokqa túsip kóz jumǵan jasóspirimniń 15 jastaǵy mektep oqýshysy ekeni anyqtaldy. Sonymen birge, taǵy bir jasópirim zardap shekti, dep habarlaıdy QazAqparat tilshisi.
Qaıǵyly oqıǵa Irchenko temir jol stansasynda oryn alǵan.
«Atbasar aýdandyq bilim bóliminiń málimetinshe, Marınovka orta mektebiniń 8-synyp oqýshysy 15 jastaǵy ul bala abaısyzda kóz jumǵan. Aldyn ala málimetter boıynsha, 2019 jylǵy sáýirdiń 11-de shamamen saǵat 16:00-de bala Irchenko stansasyndaǵy poıyzdyń astyq tıegish vagonyna shyqqan. Vagon toqqa qosylyp turǵandyqtan joǵary kerneýli elektr symynan tok soǵyp, kóz jumdy. Qazir osy oqıǵaǵa baılanysty tergeý amaldary júrgizilýde. Barlyq suraqtar ІІJB quzyretinde», - dep túsindirdi Aqmola oblysy bilim basqarmasynyń baspasóz qyzmetindegiler.
Al, Aqmola oblysynyń densaýlyq saqtaý basqarmasynyń málimetine súıensek, zardap shekken ekinshi balanyń jaǵdaıy qanaǵattanarlyq.
«Zardap shekken bala 2019 jylǵy sáýirdiń 12-de Atbasar aýdanaralyq kópbeıindi aýrýhanasynyń travmatologııa bólimshesine jatqyzyldy. «Elektr togynyń áseri» degen dıagnoz qoıyldy. Aýrýhanaǵa jetkizilgen kezde bas jáne keýdesi aýyrǵanyn aıtty. Qazir jaǵdaıy ortasha aýyr. Esin biledi. Terisinde toktyń áseri bilinbeıdi. Gemodınamıkasy turaqty. Travmatolog, pedıatr jáne psıholog tekserdi. Em qabyldap jatyr. Jaǵdaıy turaqty», - deıdi vedomstvodan.
Eske sala keteıik, osyǵan deıin habarlaǵanymyzdaı, qazirgi kezde osy oqıǵaǵa baılanysty QR QK 344-babynyń 2 bóligi (temirjol kóligin paıdalaný nemese qozǵalys qaýipsizdigi erejesin buzý) boıynsha is qozǵalyp, sotqa deıingi tergeý amaldary júrgizilýde.
