Aqmolada tergelip jatqan 300-den astam adam koronavırýs testinen ótti
KÓKShETAÝ. QazAqparat - Aqmola oblysynda tergeý-qamaýǵa alynǵan 300-den astam tulǵa COVID-19 ınfektsııasyna testinen ótti, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, Aqmola oblysynda polıtsııanyń 17 arnaıy mekemesi bar, onyń 16-sy - ýaqytsha ustaý ızolıatory, bireýi - qabyldaý-úılestirý orny.
«Ýaqytsha ustaý ızolıatory men qabyldaý-úılestirý orny - jabyq mekeme. Sol sebepti munda kópshilikpen baılanys az. Ákimshilik qamaýǵa alynǵan jáne turaqty mekenjaıy joq tulǵalardyń densaýlyǵyn saqtaý úshin tıisti deńgeıde aldyn alý sharalary júrgizilýde», - deıdi vedomstvodan.
Departament mamandary atap ótkendeı, COVID-19 pandemııasy kezinde qamaýǵa alynǵan jáne tutqyndalǵandar áleýmettik jaǵynan osal toptarǵa jatady. Qashyqtyqty saqtap, qoldy jýý, bólmede tazalyq saqtaý, kvartsteý, ylǵaldy tazalyq sııaqty sanıtarlyq normalar polıtsııanyń arnaıy mekemelerinde qatań saqtalǵan.
«Polıtsııa tarapynan tergeý-qamaýǵa alynǵandar testen ótkizilip turady. Karantın bastalǵannan beri oblys boıynsha 348 tulǵa testiden ótip, keıin tergeý ızolıatoryna jiberildi», - dep tolyqtyrdy vedomstvodan.
