Aqmolada temirjolshylarǵa tıesili 2 mln teńgeden astam aqsha tólenbegen
Kókshetaý kólik prokýratýrasy temirjol kóliginiń qozǵalysyn qamtamasyz etetin temirjol salasyndaǵy jumysshylardyń eńbek quqyǵy buzylǵanyn anyqtady.
«Naqtyraq aıtsaq, «Qazaqstan temir joly» Ulttyq kompanııasy» aktsıonerlik qoǵamynyń Aqmola magıstraldyq jeliler bólimshesi 2017 jyldyń jeltoqsany men 2018 jyldyń aqpan aıy aralyǵynda mınýs 25 gradýs aıazda, ıaǵnı, kúrdeli meteorologııalyq jaǵdaıda jumys istegen temirjolshylardyń aılyǵyna qosymsha tólenetin 15 paıyz aqshany bermegen», - dep túsindirdi vedomstvodan.
Prokýrorlar qadaǵalaýynyń nátıjesinde barlyq 222 temirjolshyǵa tıesili 2 mıllıon teńgeden astam aqsha óteldi.
Kólik prokýratýrasynyń dereginshe, eńbek zańnamasynyń jáne ujymdyq kelisimsharttyń buzylýyna jol bergen kásiporynnyń jaýapty laýazymdy tulǵalary tártiptik jaýapkershilikke tartyldy.