Aqmolada tarıhı eskertkishter týraly ǵylymı-tanymdyq basylym jaryq kórdi
KÓKShETAÝ. QazAqparat – Aqmola oblysynda ótken jyly óńirdegi kóne jáne orta ǵasyrlardaǵy tarıhı eskertkishterge jasalǵan ekspedıtsııasynyń nátıjeleri boıynsha «Aqmola oblysynyń mádenı murasy: jańa zertteýler» atty ǵylymı-tanymdyq basylym jaryq kórdi, dep habarlaıdy QazAqparat tilshisi.
«Ótken jyly Aqmola oblysynyń mádenıet basqarmasy oblys ákimdigimen birlesip Jaqsy jáne Qorǵaljyn aýdandarynda ǵylymı-zertteý ekspedıtsııalaryn uıymdastyrdy. Ekspedıtsııa aıasynda Baýbek batyr qorymynda, Jánibek-Shalqar kesenesinde jáne Bytyǵaı kesheninde arheologııalyq qazba jumystary júrgizildi. Zertteýge Ulttyq murajaıdyń ǵylymı qyzmetkerleri, Aqmola tarıhı-ólketaný murajaıynyń, Jaqsy aýdanynyń Zaporoje orta mektebiniń qyzmetkerleri, sondaı-aq L.Gýmılev atyndaǵy Eýrazııa ulttyq ýnıversıtetiniń stýdentteri men basqa da mamandardan turatyn ǵylymı top qatysty. Birqatar jekelegen sala mamandarynyń kómegimen geoaqparattyq jáne jaratylystaý ǵylymynyń jetistikteri arqyly qorytyndylar alýǵa qol jetti», - dedi óńirlik kommýnıkatsııalar qyzmetinde ótken brıfıngte oblystyq mádenıet basqarmasynyń basshysy Aıgúl Sábıtova.
Basqarma basshysy atap ótkendeı, qazba jumystary barysynda súıek qaldyqtary, ejelgi monetalar tabyldy. Olardy zertteýge Reseıden kelgen mamandar qatysty. Monetalardyń quramyn jáne jerleý oryndarynyń naqty jasy men genetıkalyq shyǵý tegin anyqtaýǵa múmkindik týdy.
Brıfıngte aıtylǵandaı, ekspedıtsııa nátıjesi boıynsha zerttelgen jerlerdiń sandyq modelin, nysandardyń egjeı – tegjeıli jospary men kartasyn, Jánibek-Shalqar kesenesiniń jáne Baýbek batyr jerlengen jeriniń 3D-beınesi daıyndaldy. Munyń bári «Aqmola oblysynyń mádenı murasy: jańa zertteýler» atty ǵylymı-tanymdyq basylymynda aıqyn kórsetilgen.
