Aqmolada tanysyn býyndyryp óltirgen adam 9 jylǵa sottaldy
KÓKShETAÝ. QazAqparat – Aqmola oblysynda tanysyn býyndyryp óltirgen 49 jastaǵy er adam 9 jylǵa sottaldy, dep habarlaıdy QazAqparat tilshisi Aqmola oblysynyń qylmystyq ister boıynsha mamandandyrylǵan aýdanaralyq sotyna silteme jasap.
Atalmysh sottyń úkiminde kórsetilgendeı, Ereımentaý qalasynyń kólik satyp alǵan aǵaıyndy eki turǵyny tanysymen qosylyp araq ishedi. Keıin aǵaıyndylardyń biri men tanysynyń arasynda janjal shyǵyp, sońy tóbeleske ulasady. Osynyń saldarynan 49 jastaǵy er adam tanysyn kóliktin qaýipsizdik beldigimen býyndyryp óltirip, Ereımentaý qalasynyń mańyndaǵy kópirdiń ústinen laqtyryp jeberedi.
«Aqmola oblysynyń qylmystyq ister boıynsha mamandandyrylǵan aýdanaralyq sotynyń úkimimen er adam QR QK 99-babynyń 1-bóligi boıynsha kináli dep tanylyp, 9 jylǵa bas bostandyǵynan aıyrý jazasy taǵaıyndaldy. Sonymen qatar, sottalýshy marqumnyń otbasyna 780 000 teńge kóleminde materıaldyq jáne 1 mln teńge moraldyq shyǵyndy óteýge mindetteldi. Sot úkimi kúshine engen joq», - deıdi vedomstvodan.
