Aqmolada taksı júrgizýshisin basynan uryp taldyryp, kóligin urlaǵan kúdikti ustaldy
KÓKShETAÝ. QazAqparat – Aqmola oblysynda taksı júrgizýshisin basynan uryp, taldyryp tastap, kóligin urlaǵan kúdikti ustaldy, dep habarlaıdy QazAqparat tilshisi óńirdiń polıtsııa departamentine silteme jasap.
Departament baspasóz qyzmetiniń málimdeýinshe, qylmys Tselınograd aýdanynda bolǵan. Shaǵym Ereımentaý aýdany Erkinshilik aýylynyń 55 jastaǵy turǵynynan kelip túsken.
«17 qarasha kúni 02:00-de Nur-Sultan qalasyndaǵy «Shymkent» dámhanasynyń aldynda 25-30 jastardaǵy er adam odan «Almaty-Ekaterınbýrg» kúre jolynyń boıyndaǵy «Rýbej» beketine deıin jetkizip salýyn suraǵan. Tselınograd aýdany Jaınaq aýylynan 2 shaqyrymdaı jerge jetkende basyna temirmen uryp taldyryp, «VAZ-21723» markaly avtokóligin urlap ketken. Kólikte zardap shegýshiniń jeke zattary da: 25 myń teńgeniń tymaǵy, 70 myń turatyn «Samsýng» telefony, 5 myń teńge aqshasy bolǵan», - dep málimdedi polıtseıler.
Kúdikti Qostanaı qalasynda ustaldy. Ol Túrkistan oblysy Saryaǵash aýdanynyń 23 jastaǵy turǵyny bolyp shyqty.
«QR Qylmystyq kodeksiniń 192-baby boıynsha sotqa deıingi tergep-tekserý júrip jatyr, kúdikti tergeý ızolıatorynda», - dedi polıtseıler.
Avtory Oksana Matasova
