Aqmolada taǵy bir aýylda 1 myńǵa jýyq bas mal beımálim dertke shaldyqty

KÓKShETAÝ. QazAqparat - Aqmola oblysynyń Ereımentaý aýdanynda 716 bas iri qara men 160 bas usaq mal belgisiz dertke shaldyqty, dep habarlaıdy QazAqparat tilshisi.

Oblystyq veterınarııa basqarmasynyń málimetinshe, qazirgi kezde, aýrý maldar tekserilip, sımptomatıkalyq em júrgizilip jatyr.

«Erkinshilik aýylynda 10 sáýir-3 mamyr aralyǵynda 716 bas iri qara mal jáne 160 bas usaq mal aýyryp qaldy. Veterınarlyq qyzmet mamandary búkil eldi mekenderdegi aýrý mal basyn tekserip, emdeýde. Zańnamaǵa sáıkes em mal ıeleri esebinen júrgizilip jatyr», - dedi veterınarııa basqarmasynan.

Vedomstvodan atap ótkendeı, asa qaýipti aýrýlarǵa dıagnoz qoıý úshin aǵymdaǵy jyldyń 11 jáne 29 sáýir kúnderi Erkinshilik aýylynan Veterınarııa boıynsha ulttyq referent ortalyǵyna aýrý janýarlardan patologııalyq materıal 2 ret jiberilgen.

Alaıda, dıagnostıkýmdardyń bolmaýyna baılanysty jiberilgen materıaldar zerttelmegen, zerthanada saqtaýda turǵan kórinedi.

Osy rette aýdan turǵyndaryna áleýmettik messendjerler arqyly Ereımentaý aýdanynyń Erkinshilik jáne Novomarkovka aýyldaryndaǵy etıologııasy belgisiz aýrý shyqqany týraly habarlama taraǵan.

Onda Erkinshilik aýyly karantınge alynǵany jáne turǵyndarǵa et, maı, qaımaq, aıran, sút jáne irimshik sııaqty aýyl sharýashylyǵy ónimderin satyp almaý jóninde keńes berilgen.

Aqmola oblystyq veterınarııa basqarmasynyń mamandary bul habarlamadaǵy aqparat shyndyqqa janaspaıtynyn, atalmysh eldi mekenderde karantın engizilmegenin túsindirdi.

«Novomarkovka aýylynda etıologııasy belgisiz aýrýlar anyqtalǵan joq. Halyqtan shaǵymdar men ótinishter túsken joq. Ereımentaý aýdanynyń Erkinshilik jáne Novomarkovka aýyldarynda aýyl sharýashylyq janýarlarynyń aýrýlary boıynsha karantındik jáne shekteý sharalary eńgizilgen joq. Adamdarǵa etıologııasy belgisiz aýrýlardyń aldyn alý úshin shıki sútti jáne sútten jasalǵan ónimderdi qaınatqannan keıin nemese pasterlengennen keıin paıdalanýdy usynamyz. Jalpy, oblystaǵy epızootııalyq jaǵdaı veterınarlyq qyzmettiń kúndelikti baqylaýynda», - dep túsindirdi QazAqparat tilshisiniń saýalyna Aqmola oblystyq veterınarııa basqarmasynan.

Aıta ketsek, jaqynda Aqmola oblysynyń Býrabaı aýdanynda onnan astam iri qara belgisiz dertke shaldyqqanyn jazǵan edik.