Aqmolada synama alynǵan 1550 ónimniń 7,5 paıyzy tehnıkalyq reglamentterge sáıkes kelmeıdi
KÓKShETAÝ. QazAqparat - Aqmola oblysynda ónim qaýipsizdigin tekserý qorytyndylary óńirdiń sanıtarlyq-epıdemıologııalyq baqylaý departamentiniń baspasóz qyzmetinde jarııalandy, dep habarlaıdy QazAqparat tilshisi.
Vedomstvonyń málimetinshe, 2022 jyldyń bes aıynda 1550 ónim úlgisi satyp alyndy, onyń ishinde 117 synama (7,5%) tehnıkalyq reglamentterdiń talaptaryna sáıkes kelmedi. Máselen, tamaq ónimderiniń 915 úlgisiniń 66-y (7,2%), azyq-túlik emes ónimderdiń 638 úlgisiniń 51-i (8%).
«Halyq tutynatyn taýarlar arasynda Keden odaǵynyń tehnıkalyq reglamentteriniń talaptaryna sáıkes kelmeý boıynsha jetekshi oryndy et ónimderi - 14,8%, qus eti jáne qus ónimderi - 13%, balyq ónimderi - 11,3%, jarma ónimderi - 7,1%, sút ónimderi 6,5% alady. Azyq-túlik emes toptardan jeńil ónerkásip ónimderi - 42,2%, balalar oıynshyqtary - 28,7%, balalar zattary - 11,1% jáne parfıýmerlik-kosmetıkalyq ónimder - 1,3%», - dep atap ótti vedomstvodan.
Sáıkessizdiktiń 75%-dan astamy ónimdi tańbalaýǵa keledi, mıkrobıologııalyq kórsetkishter boıynsha - 7,7%, fızıka-hımııalyq kórsetkishter boıynsha - 9,4%, tutynýshyny aldaý - 6%.
«Salystyrmaly taldaý oblystyń ishki naryǵynda aınalysta júrgen, anyqtalǵan sáıkes kelmeıtin ónimniń eń kóp paıyzy ımporttyq ónimniń úlesine tıesili ekenin kórsetedi – 79,6%. Bul jetkizýshiler men satýshylardyń sapasyz jáne qaýipsiz emes ónimdi sáıkestik qujattarynsyz, sondaı-aq taýarǵa ilespe qujattarsyz ákelgenin aıǵaqtaıdy. Kásipkerlik sýbektilerine qatysty anyqtalǵan buzýshylyqtardyń barlyq derekteri boıynsha Qazaqstan Respýblıkasynyń halyqtyń sanıtarlyq-epıdemıologııalyq salamattylyǵy salasyndaǵy zańnamasynyń talaptaryn buzýshylyqtardy joıý týraly 63 nusqama berildi», - dep tolyqtyrdy vedomstvodan.
Aıta ketsek, budan buryn Aqmola oblysynda tekserilgen 85 sý qoımasynyń 78-i shomylýǵa jaramdy ekeni jarııalandy .
