Aqmolada sýrrogat ana sátsiz júktilik úshin aqshany qaıtaratyn boldy
ASTANA. KAZINFORM — Tapsyrys berýshiler sotqa júgingenimen, Aqmola oblystyq sotynyń alqasy zardap shekken erli-zaıyptylarǵa moraldyq ótemaqy tóleýden bas tartty, dep habarlaıdy Kazinform agenttiginiń tilshisi.
Aqmola oblystyq sotynyń baspasóz qyzmetiniń habarlaýynsha, erli-zaıyptylardyń sátsiz bolǵan sýrrogat anadan materıaldyq shyǵyndy óndirý jáne moraldyq zııandy óteý týraly talap aryzy oblystyq sottyń sot alqasynda qaraldy.
— 2024 jyly erli-zaıyptylar E. men azamatsha D. sýrrogat ana bolý týraly shart jasasqan. Shartta uryqtandyrýdyń 2 áreketi kózdelgen. Birinshi áreket kezinde embrıon bekimegen. 2024 jylǵy jeltoqsannan 2025 jylǵy aqpanǵa deıin erli-zaıyptylar D.-ǵa 500 myń teńgeden astam qarajat aýdarǵan. 2025 jylǵy naýryz aıyna josparlanǵan ekinshi áreket D.-nyń kelmeýine baılanysty júzege aspaǵan. 2025 jyldyń sáýir aıynda erli-zaıyptylar ári qaraıǵy rásimderdi toqtatý týraly ótinish jazǵan, — dep sot istiń mán-jaıy baıandady.
Erli-zaıyptylar jumsalǵan qarajatty óndirý jáne moraldyq zııandy óteý týraly talap koıýmen sotqa júgingen. Sebebi, olardyń pikirinshe, ol shart boıynsha mindettemelerin buzǵan. Birinshi satydaǵy sot sheshimimen talap ishinara qanaǵattandyryldy. Erli-zaıyptylardyń paıdasyna 550 myń teńge qaryz somasy, tekserý, dári-dármek, jol shyǵyndary jáne 500 myń teńge moraldyq zııan óndirildi.
Alqa birinshi satydaǵy sottyń materıaldyq shyǵyndardy óndirý týraly sheshimi negizdi dep tanydy.
— Tólengen barlyq soma D.-ǵa ekinshi áreketke de qatysty aýdarylǵan. 550 myń teńge júktilik kezeńinde tolyqqandy tamaqtaný úshin qaryzǵa berilgen, alaıda júktilik bolmaǵan. Ekinshi rásim D.-nyń kinásinen ótpegen, qarajat onyń daıyndalýyna jumsalǵan. D. ekinshi áreketten bas tartýyn negizdeý úshin kardıolog pen terapevtiń tekserý nátıjelerin usynǵan, onda qosymsha tekserýden keıin rásimdi ótkizýge bolatyny kórsetilgen. Alaıda bul qorytyndylar barlyq qarajat alynǵannan keıin berilgen jáne shartta kózdelmegen medıtsınalyq uıymdardan alynǵan, — delingen sot habarlamasynda.
Alaıda sot alqasy moraldyq zııandy óteý óndirýge jatpaıtynyn anyqtady, sebebi kelisimshartta bıomaterıaldardy saqtaý sharttary men basqa da qajetti tarmaqtar kórsetilmegen. Osylaısha, sýrrogat ana talapkerlerdiń tek múliktik quqyqtaryn buzǵan dep tanyldy. Sondyqtan oblystyq sot alqasynyń qaýlysymen birinshi satydaǵy sot sheshimine ózgeris engizilip, moraldyq zııandy óteý týraly talaptyń kúshi joıyldy.
Aıta keteıik, elimizde zańsyz sýrrogat ana qyzmeti kórsetiletini jıi áshkere bolyp jatady. Sonyń kesirinen áıelderdiń quqyǵy buzylady ári olar densaýlyǵyn qaterge tigedi. Al deldaldar kiristiń basym bóligin alyp, paıdaǵa keneledi. Jibek Joly telearnasynda atalǵan zańsyzdyqtyń iske asý shemalary, qyz-kelinshekterdiń oǵan barý sebepteri men áıelderge tónetin qaýip jóninde arnaıy reportaj daıyndalǵan edi.
