Aqmolada sýdaǵy qaýipsizdik erejelerin elemeý 33 adamnyń ómirin qıdy
ASTANA. KAZINFORM — Qaıǵyly statıstıkany Aqmola oblystyq Tótenshe jaǵdaılar departamentiniń resmı ókili Ersaıyn Qoıshybaev jarııalady, dep habarlaıdy Kazinform tilshisi.
Spıkerdiń aıtýynsha, shomylý maýsymy bastalǵaly aımaq sýlarynda 33 adam, onyń ishinde segiz bala kóz jumdy.
— Ótken demalys kúnderi, ıaǵnı eki kún ishinde alty adam, onyń ishinde eki bala sýǵa batyp ketti. Kóp jaǵdaıda adamdar tyıym salynǵan, belgilenbegen shomylý oryndarynda sýǵa batty. Eresekter kóbine alkogoldik mas kúıinde júrse, balalar qaraýsyz qalady. Keıbir jaǵdaılarda ata-analar balalarynyń sýǵa jaqyn júrgenin bilmegen. Sýǵa batýmen qatar adamdar basyn uryp nemese jaı ǵana sýda ózin nashar sezingennen tipti taıaz sýda da qulap, tunshyǵyp qalǵan oqıǵalar bar, — dep atap ótti Ersaıyn Qoıshybaev.
Spıker adamdar jaqyn jerde ruqsat etilgen oryndar bolmaǵan soń kóbine tyıym salynǵan jerlerde shomylatynyn aıtty.
— Oblysymyzda 20 aýdan bar, biraq resmı túrde bekitilgen jaǵajaılar sany tek 16. Jasandy sý qoımalary men shuńqyrlardy eseptemegende aımaqta shamamen 800 tabıǵı sý aıdyny bar. Olardyń ishinde biz suranys boıynsha 108 jaǵajaıdy tekserdik, olardyń 86-sy shomylýǵa jaramdy dep tanyldy. Biraq Aqparat jáne qoǵamdyq damý mınıstrliginiń buıryǵyna sáıkes, qazirgi ýaqytta bizde júzýge ruqsat etilgen tek 16 jabdyqtalǵan jaǵajaı bar, — dep atap ótti E.Qoıshybaev.
Mysal retinde Kókshetaýdaǵy Qopa kólin alýǵa bolady. Qutqarýshy atap ótkendeı, ol tıisti túrde jabdyqtalmaǵan: qalqyma belgiler, qoǵamdyq qutqarýshylar nemese qutqarý jabdyqtary joq.
— Qopa kólinde júzýge tyıym salynǵan — barlyq jerde «Júzýge bolmaıdy» degen belgileri ornatylǵan. Teorııalyq turǵydan alǵanda, biz demalýshylardy sýda qaýipsizdik erejelerin buzǵany úshin QR Ákimshilik kodeksiniń 412-baby boıynsha kún saıyn jaýapqa tarta alamyz. Biraq biz muny istemeımiz, sebebi kún saıyn, ásirese demalys kúnderi munda 1000-nan astam adam shomylyp júr. Eger barlyǵyn jaýapqa tartsaq, qoǵamdyq narazylyq týyndaıdy, sondyqtan biz aldyn alý sharalaryn kúsheıttik, — dep qosty E.Qoıshybaev.
Qutqarýshylar sýda eki aýysymda jumys istep júr, biraq olar fızıkalyq turǵydan Qopa kóliniń búkil jaǵalaýyn qamtı almaıdy. Jaz basynan beri mas kúıinde bolǵan eki er adam sýǵa batyp ketti.
Osyǵan deıin Túrkistan oblysynda shomylý maýsymy bastalǵaly 17 adam sýǵa ketip kóz jumǵanyn jazdyq.
Qazaqstanda bıylǵy shomylý maýsymy bastalǵaly sýǵa batyp qaza bolǵan balalardyń barlyǵy eresekterdiń qaraýynsyz bolǵan.
