Aqmolada sý tasqynynyń aldyn alýda tsıfrlyq tehnologııa qoldanylady
KÓKShETAÝ. QazAqparat - Aqmola oblysynda sý tasqynyn aldyn alýda tsıfrlyq tehnologııa qoldanylady. Bul týraly aımaq basshysy Málik Myrzalınniń tóraǵalyǵymen ótken ákimdik májilisinde aıtyldy, dep habarlaıdy QazAqparat tilshisi.
Májiliste tsıfrlyq tehnologııany qoldaný arqyly gıdrologııalyq boljam ázirleýdiń jańa júıesi talqylandy. Naýryzdyń 19-nan bastap bastap óńirdegi azamattyq qorǵanys júıesi «joǵary daıyndyq» rejimine kóshti. Qazgıdromettiń málimetine sáıkes, kúnniń jylynýyna jáne jaýyn-shashynǵa baılanysty, Aqmola oblysynyń aýmaǵynda qardyń qarqyndy erýi, ózen deńgeıiniń kóterilýi kútilýde.
NASA spýtnıkteri jáne GIS-tehnologııalardyń ǵaryshtan túsirilgen sýretterin paıdalana otyryp, Qazgıdromet ortalyǵy ózen basseınderindegi qar jamylǵysyna qatysty karta qurý arqyly boljam jasaýdyń júıesin túbegeıli ózgertti. 
Atap aıtqanda, tsıfrlyq tehnologııalar jazyq jerlerde aǵatyn ózen basseınderiniń sý jınalý alańyn alǵash ret anyqtady, sonyń negizinde sý qorynyń kólemi esepteledi. Jańa júıe málimetteriniń nátıjesinde Aqmola oblysynyń ákimdigi 3-ten 7 kúnge deıin kútiletin sýdy ýaqytynda baqylaı alady. Qazgıdromet boljamdarynyń durystyǵy aıtarlyqtaı joǵary: 7 kúnge deıin - 90 paıyz, 3 kúnge - 95 paıyz.
Qazgıdromet apta saıyn barlyq óńir boıynsha ózen basseınindegi ylǵal qory kóleminiń mıllıon tekshe metr boıynsha ózgerý qarqyny týraly aqparat usynady. Jerdiń qatýy boıynsha málimetter alǵash ret usynyldy. 2018 jyly jerdiń qatý tereńdiginiń máni ótken jylǵylarǵa qaraǵanda joǵary, ol topyraqqa ylǵal qorynyń sińýine jáne ózen sýlarynyń kóbeıýine yqpal etýi múmkin.
Búgingi tańda, ǵaryshtyq monıtorıng boıynsha qar jamylǵysynyń bolýy Kókshetaý, Stepnogorsk qalalarynan, Arshaly, Birjan sal jáne Býrabaı aýdandarynan basqa oblystyń 14 aýdan aýmaǵynyń 65 paıyz kólemde baıqalady.
«Qolaısyz sý tasqynyna jol bermeý maqsatynda, Aqmola oblysynda kóktem maýsymyndaǵy tótenshe jaǵdaılardan aýdannyń eldi mekenderin ınjenerlik qorǵaý boıynsha birqatar sharalar qoldanyldy.
Aqmola oblysy aýmaǵynyń sý obektileriniń (ózender, sý qoımalary, kólder, toǵandarda jáne t.b.) qaýipti ýchaskelerinde 96 baqylaý beketi ornalastyryldy. Barlyq baqylaý beketterde aýdandar men qalalar ákimdikteriniń, oblystyń uıymdary men mekemeleriniń qyzmetkerlerinen jaýapty tulǵalardyń kezekshiligi uıymdastyryldy.
Qazirgi ýaqytta, Aqmola oblysynyń aýmaǵynda jaǵdaı turaqty. Turǵyn úılerdi sý basýǵa jol berilgen joq», dep kórsetilgen habarlamada.
