Aqmolada tasqynǵa qarsy sharalarǵa arnalǵan qarjyny jymqyrǵandar úkimi ózgerissiz qaldy

ASTANA. KAZINFORM — Aqmola oblysynda sý tasqynyna bólingen 300 mln teńgeni jymqyrǵan sheneýnikter men kásipkerlerdiń úkimi kúshinde qaldy, dep habarlaıdy oblystyq prokýratýranyń baspasóz qyzmeti.

Aqmola oblystyq sotynyń apellıatsııalyq alqasy Atbasar aýdanyndaǵy sý tasqynyna qarsy sharalarǵa bólingen 300 mln teńgeden astam qarajatty jymqyrǵan úsh sottalýshyǵa qatysty úkimdi ózgerissiz qaldyrdy.

Tergeý málimetinshe, 2021 jyly Úkimet rezervinen bólingen bul qarajat Atbasar aýdanynda sý tasqyny qaýpi bar aımaqta turatyn 200 otbasyny kóshirý úshin eki 100 páterli turǵyn úı salýǵa arnalǵan. 

Sot úkimine sáıkes:

• A. Serikbaev («Fýndamental» JShS dırektory) — urlyqty uıymdastyrǵany úshin 8 jyl 6 aıǵa bas bostandyǵynan aıyryldy, kásipkerlik qyzmetpen aınalysý quqyǵynan aıyryldy;
• R. Orlov («Prestıj Stroı 7» JShS dırektory) — 7 jyl 6 aıǵa sottaldy, múlki tárkilenip, materıaldyq jaýapty qyzmetter atqarý quqyǵynan aıyryldy;
• S. Qaranaǵaev (Atbasar aýdandyq qurylys bóliminiń basshysy) — 7 jyl 6 aıǵa sottalyp, memlekettik qyzmette laýazym atqarý quqyǵynan ómir boıyna aıyryldy.

Aıta keteıik, bul isti Aqmola oblysynyń arnaıy prokýrorlary tergegen.

Budan buryn óńirlerde sý tasqynynyń aldyn alý jáne halyqty qorǵaý jumystary kúsheıtilgeni habarlandy.