Aqmolada shetel stýdentteri medıtsına mamandyqtary boıynsha oqytylady
KÓKShETAÝ. QazAqparat - Aqmola oblysynyń ákimi Málik Myrzalın Sh.Ýálıhanov atyndaǵy Kókshetaý memlekettik ýnıversıtetiniń medıtsınalyq fakýltetinde shetel stýdentterin oqytý máselesi boıynsha májilis ótkizdi, dep habarlaıdy QazAqparat tilshisi ákimdiktiń baspasóz qyzmetine silteme jasap.
Ýnıversıtet rektorynyń orynbasary Aıgúl Jaqypovanyń aıtýynsha, oqý ornynda medıtsına kadrlaryn daıarlaý úshin barlyq jaǵdaı jasalǵan.
Naqtyraq aıtqanda, professor-oqytýshylar quramy jasaqtaldy, oqý-zerthana jabdyqtary alyndy, medıtsınalyq fakýltet dekanaty quryldy, sondaı-aq, klınıkalyq tártip jáne morfologııa, fızıologııa jáne jalpy anatomııa tárizdi eki kafedra ashyldy. Shetel stýdentterine aǵylshyn tilinde 103 oqytýshy dáris beredi.
Ýnıversıtet 2018-2019 oqý jylyna 173 abıtýrıentti qabyldady. Olardyń qatarynda Bilim jáne ǵylym mınıstrliginiń - 12, Aqmola oblysy ákiminiń 50 grant ıegeri bar. Al, qalǵan stýdentter kelisimshart negizinde oqıdy.
Sımýlıatsııalyq ortalyqtyń jumysyn uıymdastyrý úshin ýnıversıtetke dárigerlerdi klınıkaǵa deıingi daıarlaý jáne qazirgi zamanǵy zerthana - «vırtýaldy naýqas» jáne «vırtýaldy medıtsınalyq akademııa» eki qabatty ǵımaraty berildi.
«Memleket basshysynyń bastamasymen qolǵa alynǵan jobany QR Bilim jáne ǵylym mınıstrligi júzege asyrýda. Ortalyq Azııada bilim berý habyn damytý sheńberinde qazaqstandyq JOO shetel stýdentterin oqytýy tıis. Sol sebepti biz 2018 jyldyń shildesinde Úndistannyń «Sun Trap 786 Limited» kompanııasymen áriptestik týraly kelisimshart jasadyq», dep atap ótti A.Jaqypova.
Óz kezeginde kompanııa dırektory Sheıh Farýh kompanııanyń bilim berýdi uıymdastyrý áriptestiginde mol tájirıbesi baryn aıtty. Bul baǵytta kompanııa 25 jyl jumys istep keledi. Úndistannan Kókshetaýǵa stýdentterdiń alǵashqy legi qazannyń 15-nen keıin kele bastaıdy. Olardyń oqýy, jatyn orny jáne tamaǵynyń shyǵynyn jiberýshi el moınyna alatyn bolyp otyr.
Kezdesýdi qorytyndylaǵan oblys ákimi quqyq qorǵaý organdary men tıisti vedomstvo basshylaryna sheteldik stýdentterdiń qaýipsizdigin qamtamasyz etýdi, medıtsınalyq qyzmet kórsetýdi jáne óńirge tez beıimdelip ketýine jaǵdaı jasaýdy tapsyrdy.
Qazirgi kezde Sh.Ýálıhanov atyndaǵy Kókshetaý memlekettik ýnıversıtetinde shetelden kelgen 60 stýdent bilim alýda. Olardyń arasynda Mońǵolııa, Ózbekstan, Tájikstan, Reseıden kelgen stýdentter bar. Buǵan qosa, Úndistan, Pákistan, Shrı - Lanka, Nepal jáne Bangladeshten stýdentter tartý týraly kelisimshart jasaldy.
