Aqmolada sheneýnikter azamattardy áleýmettik jeli arqyly qabyldaýda

KÓKShETAÝ. QazAqparat - Aqmolada sheneýnikter azamattardy áleýmettik jeli arqyly qabyldaýda. Bul týraly Aqmola oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl departamentiniń basshysy Bergen Bespalınov aıtty, dep QazAqparat tilshisi.

Departament basshysynyń aıtýynsha, «Aqmola - adaldyq alańy» jobasy sheńberinde turǵyn úı-kommýnaldyq sharýashylyǵy, bilim berý, densaýlyq saqtaý, aýyl sharýashylyǵy, jer qatynastary sııaqty birqatar basqarmalardyń basshylary Instagram áleýmettik jelisinde tikeleı efır arqyly azamattardy qabyldaý tájirıbesin meńgerýde.

«Bul azamattar úshin tikeleı efır arqyly ózderin tolǵandyrǵan saýaldaryn qoıyp, jaýap alýdyń tamasha múmkindigi. Búgingi kúnge deıin Aqmola oblysynyń energetıka jáne turǵyn úı-kommýnaldyq sharýashylyq basqarmasynyń, «Kókshetaý qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi, Aqmola oblysynyń densaýlyq saqtaý basqarmasynyń basshylary tikeleı efırge qatysyp, 68 azamattyń saýalyna jaýap berdi. Jalpy, tikeleı efırge barlyǵy 531 azamat qatysqan» - deıdi Bergen Bespalınov.

Aıta ketsek, atalǵan joba turmystyq jemqorlyqty joıýǵa, memlekettik qyzmetterdiń sapasyn arttyrýǵa, azamattarǵa jaıly ári bógetsiz orta qurýǵa baǵyttalǵan. Joba sheńberinde «Open Spase» tehnologııasyn engizý, memlekettik organdardyń ǵımarattaryn ońtaılandyrý jáne basshylardyń kabınetterin halyq úshin qoljetimdi birinshi qabattarǵa aýystyrý arqyly transformatsııalaý máselesi qolǵa alyndy. Bul sharalar ashyqtyqty jáne halyqtyń senimin arttyrýǵa baǵyttalǵan.

Sonymen qatar, Bergen Bespalınov «Qoǵamdyq baqylaý kartasy» jobasynyń artyqshylyǵyn da atap ótti. Atalmysh joba sheńberinde aǵymdaǵy jyldyń 4 aıynda departamentke 130-dan astam ótinish túsken. Bul joba departamentke azamattardan áleýmettik jeliler arqyly kelip túsetin ótinishterdi qaraý múmkindigin beredi. Tipti atalǵan ótinishter QR «Jeke jáne zańdy tulǵalardyń ótinishterin qaraý tártibi týraly» zańynyń talaptaryn qanaǵattandyrmaǵan jaǵdaıda da qaralatyn bolady.

«Joba azamattardyń ótinishterin ýaqytyly ári sapaly qaraýǵa múmkindik beredi. Qazirgi ýaqytta departamenttiń qaraýyna túsetin ótinishterdiń 40 paıyzdan astamy áleýmettik jeliler arqyly túsedi» - dep tolyqtyrdy Bergen Bespalınov.