Aqmolada «Rýhanı jańǵyrý» sheńberinde birqatar jobalar tanystyryldy
KÓKShETAÝ. QazAqparat - Aqmola oblysy ákiminiń orynbasary Aına Mysyrálimovanyń tóraǵalyǵymen ótken jıynda «Rýhanı jańǵyrý» baǵdarlamasyn júzege asyrýǵa baǵyttalǵan jobalar usynyldy, dep habarlaıdy QazAqparat tilshisi.
Sharaǵa memlekettik mekemelerdiń basshylary, aýdandar men Kókshetaý, Stepnogorsk qalalary ákimderiniń orynbasarlary, saraptamalyq komıssııanyń, Qazaqstan halqy Aqmola assambleıasynyń músheleri, Sh.Ýálıhanov atyndaǵy Kókshetaý memlekettik ýnıversıtetiniń oqytýshylary men qoǵamnyń belsendi ókilderi qatysty.
Qatysýshylar «Rýhanı jańǵyrý» baǵdarlamasynyń «Týǵan jer», «Qazaqstannyń kıeli jerleri», «100 jańa esim», «100 jańa oqýlyq», «Jahandaǵy zamanaýı Qazaqstandyq mádenıet», «Jańa gýmanıtarlyq bilim» baǵyttary aıasynda ózderiniń jobalaryn usyndy.
Atalmysh baǵdarlamanyń tárbıe men bilim salasyna qatysty «Sanaly Azamat» bazalyq jobasy boıynsha oblystyq bilim basqarmasy basshysynyń mindetin atqarýshy Valerıı Gamazov esep berip, bilim basqarmasy tarapynan birneshe jobalardy usyndy. Onda qalada turatyn balalarǵa arnalǵan «Aýyl tynysy», kerisinshe, aýyl balalarynyń «Qala tynysy», jas mýzykanttar men shyǵarmashylyq qabileti bar jas talanttardyń festıvalderi men baıqaýlary sekildi 30-ǵa jýyq joba usynyldy. Alaıda usynǵan jobalarynyń kópshiligine birqatar usynystar men eskertýler aıtyldy.
«Elbasynyń maqalasynda aıtylǵan rýhanı jańǵyrý máselesine barsha el bolyp nazar aýdarýdamyz. Atalmysh baǵdarlama sheńberinde usynylatyn jobalar onyń atyna saı aýqymdy, mańyzdy, jas urpaqqa paıdasy mol dúnıeler bolýy tıis. Qazir eger osy usynyp jatqan jobalardy biraýyzdan qoldap, oǵan qyrýar qarjy bóletin bolsaq, ol keleshekke ne beredi? Sondyqtan jobalardy usynǵanda onyń mán-mańyzyna kóńil aýdarsaq. Ekinshiden, rýhanı jańǵyrý bolǵan soń, jobalar memlekettik tilde júzege asyrylýy tıis. Munda usynylyp jatqan jobalar tek orys tilinde. Óz tilimizde jobalardy usyna almasaq, kim bolǵanymyz?», - dedi «El birligi» qoǵamdyq birlestiginiń tóraǵasy Baqyt Smaǵul.
Osyndaı pikirdi «Qazaq tili men mádenıeti» qoǵamdyq birlestiginiń tóraǵasy Meırambek Qıyqov ta aıtty.
«Biz qazir jobalardyń tusaýyn kesip jatyrmyz. Qarap, talqylap bolǵan soń ǵana bekitemiz. Biz mıllıondaǵan qarjyny bir ǵana is-sharaǵa berip qoımaımyz. Onyń barlyǵyn sanaly túrde qarastyrýymyz qajet. Saraptamalyq komıssııa jobalardyń «Rýhanı jańǵyrý» baǵdarlamasyna tolyq sáıkes kelýine basa kóńil aýdarady. Múmkin keıbir jobalarǵa azdap túzetýler engizý kerek shyǵar, ol jaǵyna da mán berip, avtorlaryna qaıtaramyz», - dedi saraptamalyq komıssııanyń tóraǵasy, Sh.Ýálıhanov atyndaǵy Kókshetaý memlekettik ýnıversıtetiniń rektory Ábdimútálip Ábjapparov.
